CANMAKE TOKYO

夢幻胭脂膏

Canmake 23號胭脂膏——後悔冇早啲買！！（但有伏位）

前排見IG啲KOL狂推呢舊嘢，話係「白月光粉色」，我忍唔住入手咗。用咗兩個禮拜，真心有愛有恨。

先講好嘅：

· 上臉嗰下真係驚艷：我用手指點兩下，喺手背推一推先印上面，嘩——個種粉嫩係好似你由入面紅出嚟，唔係「一撻粉」浮喺面嗰隻。我本身偏白底，用佢直頭覺得塊面白淨咗，好似打完燈咁。
· 質地好癡線：佢係膏但一推開變粉，夏天用都唔覺黐𣲷𣲷。朝早八點化，到晏晝三四點都仲見到七成，以膏狀嚟講算係咁。
· 細細舊帶出街：補妝方便，但⋯⋯（睇下面）

跟住講伏位：

· 個蓋！！！ 我用咗唔夠一星期，個透明蓋邊位已經裂咗，而家要就住就住閂，好驚佢會粉碎。上網睇先知個個都係咁，Canmake呢個設計真係好差。
· 黃皮朋友用過話「中伏」：我有個fd偏黃調，借佢試一試，佢話望落塊面有啲「灰灰紫紫」，仲顯到佢個黑眼圈出嚟。所以真係唔係人人啱，白皮先係佢target。
· 佢話就話兩用，我試過搽嘴，乾到裂之餘仲顯曬唇紋，不了，咪嘥時間。

總結：
如果你係白肌/中性偏白，鍾意個種「冇化妝但係有氣色」嘅透明感，呢舊你會用到見底（如果個蓋未爛嘅話）。但如果你偏黃/小麥色，拜託你去試#16杏色先，唔好盲衝23號。

#開架彩妝#彩妝