BOBBI BROWN

晶鑽保濕修護唇膏

[愛用分享]

質地：偏硬，硬度不易受天氣影響
顏色：一共10色
滋潤度：保濕滋潤，不黏





Bobbi brown嘅晶鑽保濕修護唇膏係我成日都會用嘅潤唇膏，外型係bobbi brown一貫嘅簡約風格，由於係方型嘅管身，卡實之後蓋係冇辦法旋轉，所以唔會有唔小心轉咗成條唇膏出嚟嘅風險。


已經用咗好多~

打開之後膏體係望落係比較結實，初時上手有擔心過唔夠滋潤，但用落覺得好有驚喜。喺嘴上一抹就化開，搽完覺得滋潤順滑，而且冇黏黏嘅感覺。因為係有少少硬度嘅膏體，所以可以好順暢地搽，整個過程唔需要擔心太用力而塗得太多，亦唔會有黏住嘴唇嘅摩擦感。睇返官網主要成份有橄欖油同荷荷巴油。其實荷荷巴油並唔係油脂而係液態臘，難怪就算係8月嘅夏天拎出嚟用都唔會溶化。

呢款潤唇膏係屬於透亮嘅顏色，我分別買咗Bare Nude 同Bare Raspberry。官網上嘅顏色色差比較大，所以最好係去專櫃親身試色。Bare Nude係有少少橙調，顏色亦比較淡。所以主要我嘅用法係當化偽素顏妝嘅時候用嚟嘴唇嘅色調，偏橙少少令妝感柔和d。

而Bare Raspberry係我每日都會帶住出街。我多數到下午就會開始有d唇膏泛白，睇落氣色好差嘅問題，呢個時候我就會拎出嚟用，既可以睇落氣色好d，又可以好好滋潤返吹咗成日冷氣嘅嘴唇。

仲有Bare Claret係最新買仲未開始用，就咁睇落顏色同bare nude好相似，下次用完再分享！