Visée

黏膜亮澤持色唇膏

由於Visee 嘅開架唔係度度都有，趁圍方新開，特登去嗰邊藥妝店搵呢支係日本比Kate怪獸唇膏更加搶手嘅黏膜持色唇膏，竟然誇張到全部色號都無貨，連試用都無，唯有搵代購買兩隻最熱門PK850同PK851，咁啱係近排行過cosme store見到仲有貨，快快手再買多支OR250

所謂黏膜感，即係模仿嘴唇內黏膜濕潤嘅血色感，自然而柔焦，迷人又睇落無害，係日本逐漸流行，Visee 只係出咗6個色號，選擇唔多，不過色階跨度夠大，唔算難揀，圓柱形黑色外殼，有少少墜手，主打媲美怪獸唇膏嘅持色能力同埋黏膜色，色彩飽和度高，搽兩層已經遮哂原唇色，上唇觸感舒服，唔黏，滋潤度足，有好靚嘅緞光光澤，官方話要等60秒成膜，持色能力先會比較好，不過我發現飲水食嘢都係會甩咗一啲，不過係接受範圍內，出門最好帶埋去補妝，跟住係PK850、PK851同OR250各評

PK850，兔子戀人，代言人子瑜使用色，超級無敵難買到嘅色號，我搵咗好多間代購先買到，但後尾發現cosme store 返咗貨😐，隔幾日再去又俾人搶哂，非常粉嫩嘅珊瑚粉色，無螢光感，搽完感覺個人後生好多，難怪係大熱色號

PK851，任性的肉球，模仿貓咪手掌肉球嘅顏色，紫粉色，紫調比較重，啱皮膚白皙多啲，要配搭妝容，太重手會顯得個人無氣色

OR250，海星的戀心，赤陶紅，棕調比較重，白皮黃皮都啱搽，搽兩層會顯得好成熟，橘系愛好者應該會好鍾意呢隻色

另外三隻色號唔係太夾我平時妝容，暫時唔打算再買

PS：試色，由上而下，PK850、PK851、OR250

#火熱新品