TOM FORD BEAUTY

Eye Colour Quad

TF眼影相信係咁多化妝師同喜愛美妝嘅女仔心目中嘅眼影天花板，顏色多，粉質好，配色靚，有充足budget 一定要入手一盤

要判斷一個眼影盤粉質夠唔夠好，第一一定要試最深色嘅霧面色，要摸上手唔乾澀，推開顏色均勻唔會結塊，輕輕用手暈開唔會化唔開到，又或者捽到啲顏色消失咗，能夠將霧面色做得好，其他色都唔會差得去邊，呢樣TF係完全無得彈，無論用手上定用掃上，都容易取色，每次取色都唔會飛粉，上眼好易暈開，就算唔用打底膏，持妝半日都唔會褪色，根本就係粉質最佳模範生

顏色選擇多呢樣唔駛講，去櫃台一定會花多眼亂，唔想唔小心買咗唔鍾意嘅色號，請事前做足功課，我買咗熱門色號—20號disco dust，初初收到手有少少好可惜買錯色嘅感覺，因為佢同我手上另一盤CT嘅pillow talk眼影撞咗蜜桃粉色系，不過仔細一睇，其實TF呢盤並唔係淨係識行溫柔路線嘅眼影，因為4隻色都係偏沉穩，杏色同蜜桃色都係鮮明度同飽和度皆低，再配上非常深色嘅啡紫霧面，可濃可淡，可柔可狠，越睇越覺得TF配色真係一流，早前用佢化咗一個韓系妝容，配搭好早期已經買咗嘅TF黑管1號，可愛之餘又唔會俾人覺得做作，難怪20號會係熱門色號

仲有仲有，不得不讚眼影盤附帶嘅雙頭掃真係好好用，平時我都係用返自己嘅眼影掃，唯獨用TF時完全唔駛出動自家掃，用附帶嘅就夠，白色化妝毛柔軟唔扎眼，3個海棉頭大小合理，抓粉力夠，唔用就可惜，整體而言，貴得合理

#專櫃抵買好物