Ducato #37 珍珠粉紅甲油用後感：靚就靚，但黃黑皮要諗清楚！ 今次試咗Ducato #37，係一隻溫柔到爆嘅粉色珍珠色。有光線直射嘅時候，會見到入面有細細嘅閃粉，低調得嚟又唔會太過份；但係光線暗嘅時候，就變成一種珍珠緞光效果，望落好優雅。 講真，隻色本身係幾靚嘅，氣質感滿分。但呢種淺粉色＋珍珠光嘅組合，真係難以避免會顯手黃、顯手黑⋯⋯如果你本身係黃黑皮，真心建議諗清楚先好入，否則搽咗上手可能會覺得「點解對手好似污糟咗」咁😂 講返甲油本身，Ducato支掃頭係幾好掃嘅，好控制，好快就塗得均勻。但乾嘅速度就偏慢少少，心急嘅人要等耐啲。官方宣傳話有「光療感」，呢點我認同——搽完之後的確有種似塗咗Gel甲嗰種飽滿、圓潤嘅質感，望落好高級。 唯一要彈嘅係個樽有少少醜🤣 設計感一般，擺喺度唔算靚。但整體嚟講，以呢個價錢有咁嘅質素，性價比都算唔錯，如果你係白皮或者唔介意顯黃問題，呢隻色都值得一試嘅～ 評分（5星滿分）： 顏色靚度：⭐⭐⭐⭐ 珍珠光澤：⭐⭐⭐⭐⭐ 掃頭好掃度：⭐⭐⭐⭐⭐ 乾透速度：⭐⭐⭐ 黃黑皮友善度：⭐
看全文>>
