INNISFREE

速效淨肌修護精華

近排好流行早C晚A，所以市面都開始多咗A醇產品選擇，就好似innisfree嘅速效抗痘精華，多謝@cosme提供產品等我可以試用新產品，早排因為每月週期生咗粒巨型暗瘡又紅又腫好耐都唔消，所以可以試試呢枝速效抗痘精華。
首先講吓我嘅用法，化妝水 → 速效抗痘精華 → 眼霜 → 面霜，早晚都搽, 最重要就係一定要搽防曬，如果有時會偷懶唔搽防曬就出門我就唔用A醇類嘅護膚品。之前都有用過A醇護膚品, 要做好防曬先可以日頭用，因為日光令皮膚更加刺激，同時減弱產品功效。仲有一樣係坊間一般A醇都建議用家初次接觸最好先隔晚用令皮膚慢慢接受A醇。
由於我之前已用過A醇類產品，而且innisfree嘅速效抗痘精華標榜係低敏配方，所以我一收到就每日早晚都用。連續用14日都無皮膚刺激或者任何敏感現象(戴返頭盔先, 我咁用無問題唔代表你都得㗎, 護膚品人人使用情況都唔同, 要自己試過先最穩陣)。
質地方面係非常清爽，流動性高(我都未趕得切影相已經滴緊落嚟)，唔會油膩同埋推開好快吸收。
至於效果方面14日內毛孔都無乜改善(要知道毛孔粗大單靠護膚品係無乜成效，所以今次產品試用唔會著重毛孔變化)，佢主打嘅功效係抗痘祛印同舒緩，首先我粒暗瘡未消曬，只係細粒咗(我無搽暗瘡膏，無擠過)。祛印都無乜感覺。面頰位泛紅都無改善。但依家額頭同下巴生咗暗瘡，唔知係因為皮膚更新快咗推咗底層啲暗粒上嚟定係唔啱用。而且連續用咗兩個星期，皮膚好乾，我尋日去咗做皮膚測試，水份得50幾%，兩位乾肌朋友都高分過我。明明試用之前我只係化妝水抹面、精華、眼霜、面霜已經夠，但用到最尾呢幾日真係唔夠，變咗保濕肌底液、按壓兩層精華水、保濕精華、速效抗痘精華、眼霜、面霜。皮膚好似長期飢渴吸晒啲水份咁。環保包裝、使用感受都幾好，但無明顯效果，我自己就唔會回購。