YVES ROCHER

防脫髮洗髮露

感謝@cosme抽中我試用洗頭髮同髮醋，頭髮係女性嘅第二張臉，頭髮唔靚，妝扮再好都無用，所以我好緊張自己把頭髮，甚至特登買書學點保養。

先講一講我髮質，本身髮絲偏幼易打結，髮質易乾同毛燥，有電過髮但無染過，髮量少，平時好容易甩頭髮，我估計除咗因新陳代謝而脫落嘅頭髮之外，可能都因為洗梳時扯斷咗，所以呢排都致力於尋找防脫強韌髮絲嘅護髮用品，幾乎用完一樽之後都會轉牌子。

今次係第一次用YVES ROCHER洗頭水，返工日子要日日洗，放假就兩日洗一次，用咗大概10幾日，我就以防脫度、柔順度同光澤度三方面觀察：

防脫度：講真只係用咗半個月左右，以我經驗防脫度係無咁快睇得出，甩頭髮嘅成因好多，會甩嘅仍然會甩，唔會話甩少啲，但至少唔會甩多咗，唔知用哂成支會唔會有改善，呢part 有機會日後再update

柔順度：搭埋髮醋用真係柔順好多，毛燥少咗，唔用就差咗啲，不過搽髮尾油後會有改善

光澤度：都係搭埋髮醋光澤感係強啲，anyway吹頭技術同髮尾油都會影響頭髮光澤，至少返完10粒鐘嘅工之後，光澤都仲係度

整體用後感：暫時覺得都唔錯，洗完乾淨，唔會有殘留，清爽感啱啱好，唔會覺得頭皮仲油或者又好乾，期待用完一支後防脫效果會唔會再明顯啲

配搭風筒：小米白色吹風機