KATE TOKYO

怪獸級持色唇膏

Kate怪獸唇膏順滑滋潤唔再講，能夠將帶透明感嘅光澤型唇膏做到持久不脫色真係好犀利，唔駛再驚係飯宴時唇色甩到一撻撻咁尷尬，都唔駛出街就要諗搵廁所補唇膏，因為顏色好多，為咗揀色號做咗好耐功課，等到決定要買嗰時，貨架所剩無幾，難得偶然撞到補貨，再唔買真係對唔住自己，一口氣掃咗4個色號，因為怪獸唇膏全部顏色都係黑色長條形包裝，淨係得底部label標明色號，為咗方便自己唔駛逐個打開嚟確認顏色，痴咗label上去方便辨認

我係白皮+偏深唇，今次分別買咗2號甜潤果紅，3號暖陽奶茶，5號乾燥無花果同7號荊棘玫瑰，呢4支都係非常熱門色號。

2號係偏粉嘅玫瑰紅，如果化淡妝可以薄搽呢隻色，我有時想偷懶唔化眼影，淨係上底色+畫眉+眼線+胭脂，加上2號色唇膏，會顯得個人有氣色同睇落後生啲，極端啲素顏薄搽都仲得，不過比較啱白皮，黃皮慎選

3號係淡橙杏桃色，本身好怕偏橙偏黃嘅唇膏，搽上去好似病人咁，但係3號低飽和反而容易接受，黃皮白皮都啱搽，而且非常百搭，好適合配搭春夏妝容，有時眼妝偏向濃重嘅時候，就會配3號唇膏，薄薄一層唔會太突兀

5號係超熱門色號，不過呢隻係官網圖標係藍調偏暗嘅泥土色，換句話黃皮慎選，亦由於顏色土味重，會一樣都係唔化眼影，而想突出唇妝嘅時候用，會顯得嗰人成熟穩重，雖然熱門，到我手反而搽上唇嘅機會唔多

最後7號色係6號色嘅明亮版，好顯牙白嘅一隻色，想俾人感覺自己牙齒白搽呢隻就肯定無錯，不過要配合妝容，唔啱素顏搽

以往我好少買幾支同一牌子嘅唇膏，對上一次淨係Hourglass，今次怪獸唇膏買得仲多，依家仲考慮緊9號，11號同12號色，anyway頭2隻好似網絡限定，都係睇多幾個人試色再決定入唔入手

P.S. 試色圖，由上班下：2，3，5，7