LANCÔME

Genifique 升級版嫩肌活膚精華 (小黑瓶)

好幸運收到@cosme 邀請試用Lancôme 小黑瓶同埋極光水！非常感謝！收到之後馬上進行一星期實測！

用小黑瓶前會先用極光水煥膚，呢一篇我主要講小黑瓶～

之前我都有晌冬天用過小黑瓶，體會過佢嘅保濕鎖水力好好！去到夏天個人就懶左，諗住天氣熱，濕度高就無咁擔心皮膚乾燥。但咁係大錯特錯！因為天氣實在太熱，無論返工定晌屋企都係長期處於冷氣環境，不知不覺間會迅速抽走皮膚水份，所以保濕程序實在不能鬆懈！而夏天保濕更著重注重清爽度，所以精華嘅質地同吸收速度變得好重要。

今次@cosme 嘅邀請真係來得合時，今年七月中下旬香港熱到爆錶，晌呢個時間試用小黑瓶，絕對顯出佢嘅優勢。佢質地清爽，塗上面部好快就吸收，唔會黐立立，亦感到皮膚有柔軟嘅感覺，面部即使未塗後續嘅面霜，面上都帶有光澤✨晌炎炎夏日都唔會對皮膚造成負擔，岩哂我呢啲清爽派！此外即使長時間晌冷氣房，皮膚都keep到水份，無咁乾燥！

暫時試用左七日，感覺都非常滿意，咁岩今日我登記左去Lancôme 嘅專櫃進行肌膚年輕測試，結果相當振奮，我嘅肌膚水潤度高於同齡平均數！

無可否認，小黑瓶同極光水嘅價錢係稍高，但我認為係物有所值，大家亦可以留意Lancôme （同@Cosme ）嘅promotion, 都會有好多機會可以登記換領試用裝，不妨大膽一試，實際體驗下佢嘅效果丫！