shu uemura 植村秀

unlimited 無限輕透持妝粉底液

只要做好妝前保濕，乾性肌膚都可以用嘅持妝粉底😌✨

今次收到@cosme 嘅試用邀請，試用Shu uemura植村秀嘅無限輕透持妝粉底液，粉底 液色號係584 中性色調，除咗594之外最白嘅色階
鍾意呢種簡單包裝，有種高級、乾淨俐落嘅感覺

因為本身係乾性肌膚，黑眼圈好深🥲，間唔中會有粒粒同埋有少少痘印

上粉底液之前會用化妝水同面霜、或者滋潤啲嘅防曬。今次除咗日常護膚之外就用咗法國大寶embryolisse 保濕妝前，尤其鼻翼眼底嘴角等等嘅位置要加強保濕，會用呢個乳液輕輕打圈 ，再用洗面巾抹走 。

呢個粉底液係用唧出嚟嘅泵頭，唔會整到周圍污糟晒
佢粉質算幾細，質地偏水，好似塗改液咁😂
延展性高，好容易可以推開。相對佢推開之後會比較清爽，而且好快成膜。

呢種持妝速乾嘅粉底記得❗️記得❗️要分區上妝！我覺得呢隻粉底用手指就可以鋪開， 我會直接用手指推開，然之後好似搽面霜咁均勻鋪喺塊面度，再用打濕咗嘅美妝蛋好快手拍開佢。佢一推開就乾得好快所以最好 5秒內就要鋪好！

妝面係半啞光，塊面摸落去乾爽嘅，幾貼膚，輕薄唔會重粉感，未定妝摸都唔會有手指印或者粉痕，跟住我會用setting spray定妝

遮毛孔嘅能力唔錯 ，本身鼻翼兩側面頰中間嘅位毛孔比較大，冇用填毛孔嘅Primer 睇落都令毛孔細咗八成

佢遮瑕度唔算特別高，除咗我本身好深嘅黑眼圈🥲之外其他小斑點或者豆印都遮到6-7成，我覺得日常已經夠用
想遮瑕力高啲可以上多一層
不過本身粉底液就係均勻膚色，需要遮瑕嘅話可以另外用返遮瑕產品

如果皮膚狀態冇咁好我會加一滴haba 油落粉底液，混合再上面，咁會有種微微緞光嘅妝效

下面呢個係帶 妝10個鐘左右嘅 妝效暫時覺得佢持妝唔錯，唔太覺得暗沉。即使有混合油上，之後帶妝差唔多12個鐘都冇乜點甩，係鼻翼會有少少乾，因為食飯嘴角會有少少甩，其他地方都keep得好好，有好輕微出油

下次會想入手埋佢嘅精華粉底或者修護粉底試吓🤭

如果乾性皮膚想秋冬用就建議落一滴護膚油混合，夏天用應該冇問題😌
混合或者油性肌膚嘅朋友應該一年四季都可以用到啦