MAYBELLINE

FIT ME！反孔特霧粉底液

感謝今次@cosme嘅試用品，前一排睇到出咗新品好多KOL都推介，自己都有啲心郁郁。

試咗110號色，同118都係暖色系，但係118睇落會再黃啲，103感覺更適合皮膚白淨嘅人用。包裝上，比起印象中5年前朋友用嘅版本，多咗泵頭，應該係好耐前已經有加，但始終都係方便取量。

粉底液主打反孔，上面的確可以掩蓋鼻翼同周邊嘅粗大毛孔。質地都算易推開。同埋霧面效果，都還算可以，上面時可以感覺到粉質比起其他滋潤粉底有所不同，摸起係霧面但又未去到完全不黏笠，要留意上妝前要做好皮膚保濕，否則額頭啲位有機會會起皮，薄薄上完成塊面，感覺有啲位都係會有光澤，未去到全面完全霧面，不過也OK，唔會好似戴住面具咁。仲有遮瑕方面，都有8成左右，剩餘交俾遮瑕。

控油持妝效果，因為試妝嗰日冇出門，冇戴口罩同出汗，為咗試持妝效果，都冇噴定妝噴霧上碎粉。上完妝後6個鐘照鏡，係有出油嘅，表現喺妝容光澤感更強，遮瑕度就唔得啦，可以睇到原本遮住嘅小斑點，但係唔覺得會有好明顯暗沉。如果正常做好定妝應該還算可以，不過有機會戴口罩摩擦位會帶走啲粉底。

整體上都算中規中矩，完全依賴粉底自身可以有完美妝容就唔夠，後期輔助都需要跟上。