INNISFREE

紅茶逆時活膚塑顏精華

首先多謝@cosme 同埋@innisfree抽中我，令我有呢個使用機會試用兩樣皇牌產品---包括「紅茶逆時活膚精華水」同埋「紅茶逆時活膚修復精華」。

講下自己既皮膚狀態先，自己本身係混合性偏乾性肌膚，乾性肌膚係皮膚好乾既時候會顯得好無光澤，好似即刻老左幾年咁，所以保濕對自己都好重要！收到兩件產品既時候，兩件產品都係以紙盒包裝，唔係普通既裸妝貨品，令人打開既時候有一種神祕感！再加上用紙盒包裝，遲啲又可以拎去做回收，又環保又帶到少少神秘感比我，哈哈！

打開包裝後，見到「紅茶逆時活膚精華水」既包裝係磨砂質地，即刻心心眼！真係好靚好有質感，即刻有種好高貴既感覺！當見到精華水係真係紅茶既顏色，都有少少懷疑會唔會容易令皮膚敏感，但係當見到官網話敏感肌膚都適用就即刻放心曬！我既用法就係將精華水倒落化妝棉抹一次面先，再倒落手心輕輕再拍一層上面，肌膚飲飽水就即刻無咁暗啞，有少少光澤同提亮既感覺，再搽埋「紅茶逆時活膚修復精華」，精華係以滴管形式滴出，可以輕鬆控制用量，唔怕一次過倒得太多出來造成浪費，就算我係乾肌4-5滴都夠搽曬全塊面，本來見到精華係輕微乳白色狀都有少少擔心會唔會太杰，唔容易吸收或者淨係可以停留係肌膚表層，估唔到一推開好快已經吸收曬，塊面好快已經無曬水係面上，反而望落水水潤潤，真係好舒服，又夠保濕，又唔會黏著塊面唔舒服或者整污糟枕頭。第二日起身真係都仲keep到個效果，塊面望落一啲都唔暗沈，好光滑，膚色均勻左，塊面比起之前果幾朝都有光澤左唔少，官網聲稱既「逆齡」係真架！！！keep住用左2個禮拜左右，皮膚真係好左，尤其係提亮膚色方面最有感！乾肌朋友一定要入手！