KLORANE

金雞納及有機雪絨花防脫育髮精華

多謝@cosme 今次邀請我試用KLORANE嘅金錢納及有機雪絨花防脫育髮精華，其實一直都好期待可以試用到有效又易用嘅育髮精華，因為近幾年比較大壓力越甩越多頭髮，有時沖完涼望到個去水位真係會嚇親，所以我真係好需要用育髮產品，再次多謝@cosme 咁貼心畀我試用今次嘅育髮精華，仲要有機嘅添，夠晒天然。

KLORANE嘅育髮精華真係好方便用，洗護髮吹乾之後，直接喺頭髮比較稀疏薄弱嘅地方直接噴上去，再用手指頭輕力按摩，等佢自己滲透就可以<我自己懶唔吹頭，所以會第日瞓醒覺先噴XD

有別於我之前用嘅另一個牌子嘅育髮精華，佢係噴霧頭可以直接噴上頭，噴嘅時候會聞到一浸草本植物味，感覺有啲似清爽嘅古龍水味，至少我一啲都唔抗拒，唔會好似我之前用過嗰種咁，有種貓尿味，又要怕滴喺頭上唔均勻，難控制先啦。

好，講返成效先，我暫時用咗2星期，由未用前嘅一洗頭就甩30幾40條頭髮，到用咗之後每次洗頭甩20條頭髮左右，我覺得佢都算幾成功喇，見到髮量都多咗，比未用前厚咗，價錢又唔貴，所以我應該都會回購，亦會留意吓下次有機會都會買埋佢嘅洗頭水護髮素一齊用。

PS分享吓半年前睇過一條台灣髮型師嘅洗頭教學片話咁會冇咁易甩好多頭髮之後，平時我洗護髮嘅程序就係咁，自己試咗一段時間發現真係好咗，有興趣嘅朋友可以都試試:
1)泵2下洗頭水喺手心，加水搓到洗頭水乳化(即係開始變乳白色有少少泡)，咁樣洗2次
2) 泵1下護髮素輕輕只搽上耳仔以下嘅髮絲，輕力用手指簡單梳鬆啲打咗結嘅髮尾，等1-2分鐘先洗返走(我自己會趁呢個時候搽沐浴露沖涼)
3)用毛巾輕輕力索乾頭髮，唔好用毛巾不停來回搓啲頭髮呀，會好易打結同造成分叉斷裂㗎。

希望下次都可以抽中試到/買到啲好用嘅產品同大家再分享啦，thank you @cosme

#KLORANE