NARS

Light Reflecting 原生光亮肌粉底液

今日同大家分享NARS 最新推出嘅 Light Reflecting Foundation 原生光亮肌粉底液。

皮膚睇落好同差，真係好影響顏值；所以
喺各類化妝品中，粉底係最值得同需要投資嘅品項！所以我個人對粉底嘅要求都幾高，用過植村秀、Armani、Gerlain、貴婦底妝Albion、MAC等等。如果遇到好粉底，貴少少都值得的。

我皮膚無重大瑕疵，但有面黃問題；鼻頭、鼻側兩邊毛孔比較粗大；皮膚缺水，所以有時會出現卡粉問題。所以自然透薄、質地滋潤少少嘅粉底比較符合我嘅需求，最緊要千祈唔好氧化同卡粉！！

NARS Light Reflecting 呢枝粉底主打提亮膚色，強調折射光線，令肌膚睇上去更透光，都切合近年強調「無瑕素肌感」嘅大趨勢，亦符合我嘅粉底偏好～

首先講下粉底液嘅質地。大多數粉底液都有少少杰身，但原來佢係水狀，唧出嚟嘅時候真係有啲出乎意料！水狀粉底液均勻易推、延展性高，上粉時已經feel到佢好滋潤👍🏻因為我有卡粉問題，所以唔鐘意偏乾嘅粉底。呢枝粉底嘅潤澤感非常合我心意❤️不過我建議個粉底樽可以改善下！因為水狀粉底真係唔太適合用唧出嚟，唔太容易控制份量、又會搞到個唧口位污糟…

再講下妝感。只能說呢枝「原生光亮肌 Light Reflecting」粉底液的確無改錯名——提亮能力及偽素顏效果超一流😆😆 如我先前講，個人最大嘅問題係面黃、暗沉。用完粉底後皮膚變到好有透明感，面頰喺光線下會泛微微光澤，我形容係「天使光」😆 而且妝效相當自然，幾乎見唔到任何粉底痕跡！真係好鐘意好鐘意好鐘意😍如上圖所見，上完粉後成塊面都glowy左，本身鼻頭黑黑地，都變亮白左。鼻頭同鼻兩側面頰位，本身毛孔較粗同泛紅，上粉後都遮哂。

最後講下持久度。本身以為呢枝粉底並唔持久，但估唔到都有驚喜！上妝8小時，無卡粉、無氧化，而且出左少少面油之後，妝感都仲係好靚！戴口罩時會痴到粉底，但係可以接受。
總括嚟講，非常推薦入手
妝感：5/5 - 賦予自然光澤感，皮膚會有天使光
貼膚度：5/5 - 透薄到唔似上左妝，但鼻頭同鼻兩側毛孔都遮哂
遮瑕度：3.5/5 - 可較正泛紅、黑眼圈、毛孔等問題，但暗瘡、太大嘅毛孔窿同眼紋就覆蓋唔到，較適合無嚴重瑕疵嘅用家
持久度：4/5 - 最重要係無氧化！無變黃！8小時無補妝、出面油都keep到