YVES ROCHER

防脫髮洗髮露

對Yves Rocher呢個牌子唔陌生，一直有使用過佢哋唔同系列嘅護膚品同沐浴露，就係偏偏無試個洗髮露。今次終於有機會啦 ！

先講講包裝，容器係深綠色膠樽，揭蓋式樽蓋仍然可以單手用手指公輕易推開樽蓋，開合都有咔一聲，合埋眼都可以知道開合情況。擠口較坊間嘅大，所以輕輕按樽身就已經有足夠份量。

洗頭水香味主要係花香，好香好獨特又唔俗氣，覺得好舒服。

用法就好似一般洗頭水，手心搓到起泡後再搓落頭髮/頭皮到。自己習慣用洗頭梳去進一步按摩頭皮，呢個時候會覺得唔夠泡沫，再多啲會安心/開心啲，所以我通常會係呢個時候再補多少少落去頭皮。洗完頭感覺乾淨清爽，頭皮一啲都唔崩緊。然而過咗大約20小時後（室內工作），會感覺到頭皮有輕微出油，大概係自己感覺到但唔會令頭髮嘅空氣感減低嘅出油狀況。

特別想講吓脫髮量嘅改變，呢款洗頭水的確能夠令我嘅頭髮更強韌！用咗兩星期左右，洗頭嗰陣甩嘅頭髮減低咗1/3左右，少數怕長計啊！！相信同當中嘅特別成份有關，多管齊下咁係唔同方面針對脫髮問題。

整體而言，呢款洗頭水嘅香味、清潔度、滋潤度我都非常滿意：）如果佢可以提高控油能力就會更完美。