Hair Recipe

米糠溫養修護護髮素 (生薑檸檬香氣)

之前見到呢一set Hair recipe嘅米糠溫養修護洗髮露同埋護髮素就已經好想試，不過因為見到佢價錢比起其他品牌稍為貴啲，同埋產品容量都比較細，所以諗咗好耐一路都未有機會試。所以好開心今次抽中咗可以試用到呢一set洗頭水護髮素。

首先講咗包裝先啦，佢個外型設計好特別，望上去亦俾人好高級嘅感覺，實際用落會發覺支洗頭水同埋護髮素嘅size對手細嘅女仔嚟講幾好揸，而且唔會太重，用嘅時候好容易唧到洗頭水同護髮素出嚟。

香味嚟講，薑嘅香氣比起檸檬嘅香氣重，不過嗰種香氣聞落去係會覺得好舒服好治癒嘅，而且洗完個頭後會發覺唔會好重薑味，即使如果你本身好唔鍾意薑味都應該問題不大。

另外就係性價比啦，由於佢嘅定價比其他品牌貴少少，所以我都好concern佢嘅性價比。第一次用已經發覺其實佢只係需要好少份量嘅洗頭水（尤其比起我自己本身用緊其他品牌嘅洗頭水）已經可以洗乾淨成個頭，呢一方面係有少少surprise到我嘅。

再嚟就係產品嘅用後效果，用完呢一set洗頭水同護髮素之後，會發覺頭髮真係順滑咗好多！特別係支護髮素，佢支護髮素用完之後個效果可以媲美其他品牌Hair mask嘅效果！因為我自己頭髮本身比較粗，而且頭皮油+髮尾乾旱嗰隻，本身髮質都幾多問題吓。用完之後會發現呢一set洗頭水同護髮素可以一次過解決我幾個問題，洗完頭之後覺得頭皮都好乾爽，比較冇咁容易出油，而髮尾嘅乾旱問題亦都得到明顯改善，望落去髮尾會多番少少光澤，而且吹完頭髮後甚至瞓完覺第二朝起身個頭髮依然非常柔順，效果令我意想不到，所以非常推薦呢一set洗頭水護髮素俾大家！