HELENA RUBINSTEIN

REPLASTY 修復眼霜 (黑繃帶眼霜)

好開心今次可以試用Helena Rubinstein嘅REPLASTY修復眼霜及REPLASTY修復晚霜，佢哋就係大名鼎鼎嘅黑繃帶晚霜同埋黑繃帶眼霜
呢度左邊係眼霜，右邊係晚霜，可以睇到眼霜嘅質地比較水潤易推開，晚霜會比較厚實少少

黑繃帶晚霜有市面上最高濃度嘅30%專利玻色因 ，玻色因係溫和而有效嘅抗老成份，所以敏感肌都可以安心使用👍🏻 除咗抗老功效，黑繃帶晚霜裏面仲有透明質酸為皮膚強效補水，甘草酸嘅抗炎成份，有修復屏障，抑制泛紅同埋紓緩肌膚炎症嘅作用。

而黑繃帶眼霜同晚霜一樣有30%高濃度專利玻色因，講到補濕方面，佢係加入咗4重透明質酸、積雪草萃取物及維他命原B5 。

其實喺今次試用活動之前我之前已經有用過黑繃帶晚霜，對乾肌嘅我嚟講係唔夠補濕，今次一於試吓用啲滋潤少少嘅精華打底，再比多次機會佢🤣

今次經過大約兩星期嘅試用後，覺得黑繃帶面霜可能真係唔係咁適合乾肌使用🥲就算加咗精華打底效果都係差唔多。雖然乾肌無緣使用，但係聽講好多油痘肌嘅朋友用完feedback都好好，希望品牌方可以考慮吓推出一個滋潤版for乾肌嘅朋友啦🤣

喺另一方面，黑繃帶眼霜竟然令我有驚喜🥹👍🏻喺佢新推出嘅時候我係完全冇諗過試，因為之前用個晚霜嘅關係，我以為我同佢都會八字唔 夾，但係佢竟然好夠保濕。可能係因為眼霜裡面添加嘅補濕成份比較多，佢係比晚霜更加滋潤，而且潤而不油，喺香港咁潮濕嘅夏天都適合使用。喺用完屋企嘅眼霜之後可能會考慮回購呢個黑繃帶眼霜👍🏻搽上眼係會有明顯有滋潤感，潤而不油，就算眼周比較乾，搽咗上眼都會覺得幾舒服，不過可能係試用時間比較短，所以暫時未見到有明顯淡淡細紋同黑眼圈嘅效果，提拉嘅效果都係暫時未有感受得到🤣

我平時搽錯嘢或者係用咗啲刺激成份比較高嘅產品都會容易敏感，每次轉季時皮膚狀態都會唔穩定。而HR嘅黑繃帶晚霜同眼霜都冇令我敏感，同埋皮膚唔穩定嘅時候使用會有修復功效，所以呢兩個產品都好推薦比敏感肌嘅朋友😊