ARMANI Beauty

Power Fabric Pro 專業柔霧持妝粉底液

感謝 @cosme 抽中試用ARMANI beauty Power Fabric Pro！

ARMANI beauty嘅粉底液一直都喺專櫃粉底液品牌入面幾出名，今次係第一次親身用呢個品牌。

雖然佢係粉底液，但係佢唔係好似平時啲粉底液流動性咁高，一開頭覺得有少少難推。跟住再睇返官方說明發現原來呢款粉底液係用咗「液轉粉」技術，所以比起粉底液、反而更加似我最近用開嘅BB cream質地。

呢款升級版零瑕持久粉底液係柔霧微光妝效，最欣賞係佢一上臉之後塊臉完全冇黏笠嘅感覺。以前用過有啲粉底液上臉之後嘅黏笠感覺令我覺得好厚重、塊臉好似呼吸唔到咁樣，而呢一款粉底液令我發現塊臉有透氣嘅感覺所以加咗分。

雖然呢款升級版零瑕持久粉底液遮瑕程度都唔低、有柔焦嘅感覺，冇乜大瑕疵嘅人基本上唔使再另外用遮瑕，泛紅、黑頭同毛孔都遮到，但係始終都遮唔到我臉上嘅雀斑。

我有一次特登帶咗口罩出街測試粉底嘅持妝度，雖然口罩上面都有少少粉，但係喺臉上面甩粉嘅痕跡非常少，所以都幾滿意佢個持妝度。

整體嚟講冬天用呢款粉底液嘅持妝度都幾好，出街八個鐘都冇溶妝，不過因為戴咗口罩試，所以鼻頭位甩咗少少粉。出門八個鐘之後鼻翼有少量出油（本人係混合偏乾，兩頰位置偏乾，但係T字部位出油），但大致上都冇影響成個妝感。
氧化方面都冇乜太大問題，出門八個鐘之後都唔覺有嚴重嘅氧化。本身見色號係3.8驚會太深色，但點知上臉之後又幾適合自己膚色，唔會太白 / 太深色，然後夠晒自然，出一日街之後都唔覺會暗沉咗一度。

見官方寫話呢款粉底液都適合悶熱天氣、可以全日抗汗抗油，遲啲等夏天嘅時候再試吓佢個溶妝程度同持妝度先。