LANCÔME

極致持妝輕透粉底液(已停產)

多謝@cosme 俾機會試用~

以下各項滿分係5粒星

香味⭐
有濃濃花香味（？），唔鍾意香味嘅人要注意。
搽上手測試，45分鐘後都仲會聞到陣香味。
如果冇香味，會更加鍾意呢支粉底~

妝感⭐⭐⭐⭐⭐
透薄，自然，冇明顯粉感。霧面妝感。

易推度⭐⭐⭐⭐
雖然係粉底液，但佢唔係好水、會流動咁，上手圖見到冇推開嗰滴粉底液，係完全冇流動。之後隻手點郁，佢都仲係原封不動！
雖然有啲杰，但唔影響佢嘅易推度~ 我用手指好快就搽好全塊面。
個人感覺有啲快乾，建議每次少量快手推開，唔建議點哂全塊面先推。特別係毛孔大嘅位置，乾咗先嚟推就會變咗白芝麻🫤

遮瑕度⭐⭐⭐⭐⭐
上手圖見到有推開嗰邊膚色好均勻，遮到青青哋嘅血管。
上面圖見到膚色均勻咗，毛孔都修飾咗，不過太深嘅暗瘡紅印就唔會完全遮哂了。遮瑕度夠，但唔會好粉樣。

控油/持久度⭐⭐⭐⭐⭐
超強控油力，用佢就唔需要再搽其他控油底霜，否則會太乾。
混合皮膚嘅T位用佢啱啱好，面珠如果做唔夠保濕，到下晝會太乾而浮粉。做夠保濕嘅話，個妝係keep 到全日。
乾皮要做好保濕先試~