KERASTASE

逆時光至臻香氛修護精華

感謝@cosme提供KÉRASTASE產品試用。

一直有聽聞KÉRASTASE嘅護髮產品好好用，今次終於有機會試吓。KÉRASTASE CHRONOLOGISTE 逆時光至臻修護系列係屬於高級嘅Line，靈感源自珍貴生命之源「魚子」，薈萃深海巨藻萃取加強頭髮自我再生力量，添加護膚成份透明質酸及維他命E，使用後可以大幅增加頭髮水潤度及光澤感，而且抗毛躁，讓頭髮瞬間注水，保持亮麗光澤。呢個系列嘅另一個特別之處，就係邀請了香水界權威調製了典雅高貴玫瑰香，香味好高貴，提升咗使用產品嘅時候嘅整個體驗同享受😌。

今次試用有三種產品，分別係逆時光至臻修護浴髮乳、逆時光至臻修護髮膜同埋逆時光至臻香氛修護精華。

首先試用嘅係浴髮乳，佢嘅質地係透明比較稀嘅液體，加少少水慢慢揉吓就會起泡，泡沫豐富而細緻。將泡沫放喺濕髮上輕輕用手指頭按摩，覺得頭髮好滑好易搓，沖水後嘅頭髪係清潔得來又保濕順滑，感覺好好。

洗完頭之後就用修護髪膜，以hair mask嚟講佢個質地比較稀，擺喺手心係會有少少流動嘅，就咁睇會以為唔夠滋潤。點知第一次用完之後就好有驚喜，發覺沖水後啲頭髮已經好柔滑，而且感覺到好水潤，幾正。但係要留意係用量唔好慳，一定要用比較多嘅份量，確保所有頭髮都cover到，咁樣用完出嚟嘅效果會好啲，同埋用嘅時候我會包住個頭5分鐘焗吓，等啲頭髮吸收到好啲。

最後一步就係用修護精華，呢隻精華含有維他命E及茉莉花萃取。雖然佢個質地睇落去係油狀，但用起上嚟一啲都唔油唔笠。我會印乾全頭嘅水份，再擠兩泵喺手心度，雙手用手指搓開個精華再搽上頭髪上，大概由髮根對落1/3嘅位置開始搽到髮尾。呢隻精華好容易吸收，搽完喺頭髮上面已經即時感覺到頭髮變得水潤。

我總共試用咗7日。總括嚟講，呢個系列嘅產品真係做到修護頭髮，令頭髮變得水潤柔滑嘅效果，個人係幾鍾意嘅。而且bonus係佢呢個系列嘅產品個香味幾正，有一種貴婦感，係優雅唔俗氣嘅香味，所以用佢嚟洗頭護髮就有額外嘅享受😌，會考慮回購。