DOLCE & GABBANA

Fig Skin Perfector

感謝@cosme 提供產品試用。今次係我第一次用Dolce & Gabbana Beauty嘅產品，成個底妝系列嘅包裝走奢華風，金色包裝高貴得來又簡約，而且三件底妝產品都含有天然保濕成份，真係好吸引😍

Fig Skin Perfector係定妝粉餅，金色方型小盒子真係好靚好搶眼，個盒係用金屬製造，裡面嘅粉餅壓有DG字樣及紋理，好有質感。

質感：粉餅驟眼望上去看似好白，用手指沾取發覺佢係半透明嘅粉末，粉質細緻，有少許光澤，唔會影響底妝顏色，呢點幾好。可惜個粉餅壓得太實，用化妝掃打圈沾取都只可以攞到少量粉，取粉有啲困難，要用掃大力啲打多幾個圈先可以取到少少粉，試過用碎粉樸取粉更加係完全不行。如果產品可以提供埋上妝工具就更好。

效果：用Fig Skin Perfector嚟定妝，上咗粉都好自然，會keep到個妝有少少光澤感加半霧面嘅效果，皮膚睇落幾細緻。個人覺得剛上妝個效果幾靚，同埋啲粉都貼面，而且上完粉係完全唔會覺得乾。但係唔知係咪因為取粉有啲困難所以上得太少粉，控油能力唔算好強，上妝半日時間個額頭已經明顯出油(我係乾性混合肌）。

總結：呢個Fig Skin Perfector包裝好靚，粉質幼細而帶微微光澤，妝感都幾靚，而且保濕唔乾，但係油性皮膚可能會略嫌佢控油能力唔夠。個人認為若果產品可以附有合適的上妝工具，整個上妝體驗及效果會更加好。