CLINIQUE

100小時自我修護水嫩補濕啫喱（粉紅爆水啫喱）

多謝@Cosme 嘅邀請 ，今次試用嘅係Clinique 嘅粉紅爆水啫喱。

一直聽聞粉紅爆水啫喱係Clinique 嘅皇牌產品，今次使用嘅已經係第五代嘅升級配方，官方話可以長效保濕100小時，藉住今次轉季嘅 天氣變化，就可以 試真啲。

本人皮膚係混合偏乾， T Zone 位易出油，兩邊由面頰乾 ，護膚態度 極度懶惰 ，信奉less is more.

1.包裝
包裝除咗一個綠色紙盒之外，就只係得呢個粉紅爆水啫喱， 係一個透明嘅玻璃樽，拎上手唔算好重。

擰開個蓋之後有另一個白色嘅蓋仔，第一次用要拎開個蓋仔有啲困難 ，冇一個微微突出嚟嘅地方，可以用嚟受力打開 。之後用嗰時，個白色蓋仔會長期黐住上層個銀色蓋😂

本身以為跟機會有個匙羹仔 ，可以減少人手接觸以免產生細菌 ，冇就唯有用手指 撩，保質期係開封後24個月，睇嚟要快啲用完 🤔

2.產品
粉紅爆水啫喱果然冇改錯名，係淡粉紅色嘅啫喱狀 ，好容易推開，完全冇任何香味 。

試用時間係九月尾，日頭仲係30幾度但夜晚可以得返25度。

朝早淨係搽咗爽膚水同埋粉紅爆水啫喱，加埋防曬就返工 。雖然係戴住口罩但係冷氣房，保濕程度尚可，唔覺得特別乾燥 。

如果嗰日要化妝，搽咗粉紅包水啫喱之後上妝 ，係會貼服啲，不過對妝嘅持久度就冇幫助 。

夜晚單搽爽膚水同粉紅爆水啫喱就唔得喇 ，就算冇開冷氣瞓，第二朝都會出油。但如果係爽膚水、精華、粉紅包水啫喱， 效果 可以持續去第二朝 。

總括而言，如果你懶懶地， 換季想搵一樽保濕、又唔會癡粒粒嘅cream，粉紅爆水啫喱係唔錯嘅選擇 。