YSL BEAUTÉ

恆時輕透霧光粉底液

多謝@cosme 畀機會我，令我有幸試用YSL ALL HOURS FOUNDATION恒時輕透霧光粉底液同埋ALL HOURS SETTING POWDER 恒時啞緻蜜粉。
曾經用過同款舊版嘅B10色號，我今次試用嘅色號係LN1，更貼近亞洲女性中性白皙膚色，既唔會太黃，亦唔會死白。

我嘅皮膚係敏感肌偏乾，面頰有毛孔粗大同膚色不均嘅問題，今次使用前嘅皮膚狀況唔係幾好，仲有啲小粉刺。呢個係使用前嘅面：
上一代恒時粉底液冇護膚成分，嗰陣我皮膚狀態差嘅時候都唔敢用。今次嘅粉底液有護膚成分，含透明質酸，有助保持水油平衡。我先用護膚品做一個基本嘅保濕，然後用一個冇色嘅隔離霜，用半泵份量嘅粉底液+粉底刷搽上面。上一代恒時粉底液只有 SPF 20 PA+++，今次試用嘅粉底液有SPF 39 PA+++！升級咗嘅防曬效果，令我可以唔需要上妝前搽防曬。至於蜜粉，我上完妝後喺T字位輕輕由內向外掃一層。我另外再搽咗個胭脂。以下係妝後嘅即時效果：
粗大嘅毛孔即刻唔見晒，暗沉嘅膚色瞬間提亮，啞緻霧光嘅妝容，好似有磨皮嘅效光咁，連小粉刺都即刻隱形。加咗個胭脂之後，皮膚白裡透紅，好似天生就有好皮膚咁，而且妝感輕透唔黏稠，睇落好自然。比起上一代嘅恒時粉底液，因為自帶更強嘅防曬效果，即使有較多嘅戶外活動，都唔需要額外搽防曬，令妝容更輕透，使用更方便。雖然係啞緻妝效，但偏乾肌嘅我喺做咗妝前基本護膚之後再上妝，都唔會有乾紋。

因為今次嘅粉底液主打24小時長效、抗汗、抗油同修飾毛孔，我特意測試一下使用後唔同時段嘅妝效。我試用嘅時間係五月初，正值潮濕又熱又焗嘅夏天。以下係出門後6小時嘅妝容：

圖中可見，我嘅胭脂甩咗一啲，但係底妝仍然保持原來嘅顏色，冇因為時間嘅推移而氧化。我睇返資料，原來呢隻粉底液含有茉莉花瓣萃取，能有效抗氧化，全日都可以持色不暗沉。因為天氣炎熱，我嘅面頰出咗油同埋汗，但粉底絲毫冇脫落，粗大嘅毛孔同小粉棘仍未返出嚟，妝感依舊透薄自然唔黏笠，very good!

以下係上妝後10小時嘅妝容（中途冇補妝）：
圖中可見，我嘅胭脂幾乎甩晒色，但係底妝仍然保持原來嘅顏色，完全冇氧化，膚色依然透亮，都睇唔到膚色不均勻嘅問題。但因為我一直冇補妝，面部亦有出汗同出油，10小時後，我嘅面油同粉底液混合後，雖然毛孔比6小時嗰個顯著，但係呢個妝容反而變得有光澤，妝效都好自然。用返恒時啞緻蜜粉補返妝之後，即刻做到除去油光嘅效果，而且妝感自然，不留痕跡。

總括而言，呢一款粉底液同蜜粉喺潮濕嘅春夏季仍然可以打造啞緻、透薄、自然而持久嘅妝容，我非常喜歡呢個組合。希望能借@cosme 呢個平台推薦畀大家！