Dermacept

維他命C草本嫩白精華面霜

Dermacept嘅呢款面霜有好高效嘅保濕感，聞落亦有一浸淡淡哋唔化學嘅橙味。

可能因為加入咗維他命C嘅精華嘅關係，所以佢嘅texture感覺會偏厚重少少，不過其實佢都好易吸收，搽完上臉過多幾分鐘之後就唔會有任何嘅黏笠感，用完佢後續再上其他化妝品都唔會打交。

但係因為咁啱試用嘅期間正值香港最潮濕翳焗嘅日子，而我自己亦都屬於混合性偏油肌，喺呢啲天氣下都係prefer面霜塗抹嘅過程係盡量輕盈啲，所以覺得對油肌嚟講，呢款面霜都係推薦喺天氣比較乾燥寒冷嘅時候去使用會更為合適。

同埋用咗兩個禮拜覺得皮膚係多咗少少光澤感，不過要真係做到美白嘅效果就暫時未話好顯住。