Tempo

棉柔潔面巾

多謝@cosme 給予試用機會
其實以往沒有使用潔面巾的習慣，自從多年前戒掉毛巾(因為感覺易滋生細菌) 後一直都是使用抽取式紙巾印乾面部皮膚。

今次試用tempo 棉柔潔面巾好有驚喜。首先佢係100%天然純棉，而且不含螢光劑、漂白劑，可以放心使用。用落感覺親膚，柔軟，唔甩毛/棉絮，吸水力強。我用開卸妝乳卸妝，用紙巾tissue off 抹走既話張紙巾抹抹吓好易爛；用tempo 潔面巾就冇咁既問題，敷cream mask甚至泥膜 用佢抹走輕鬆好多。而且有時mascara未卸乾淨未卸走晒用呢隻潔面巾可以幫我抹走埋。

佢有立體格紋設計，洗完面用佢可以輕鬆抹走多餘角質，我本身皮膚偏薄易敏感，物理去角質即係scrub呀潔面粉粒粒大啲既都用唔到，化學去角質AHA/BHA 等等酸類只可以間唔中用。結果近鼻位角質堆積比較嚴重，之前去美容院買嘢連個consultant 都話我皮膚幾好係角質比較厚啲。我覺得tempo潔面巾幫我解決到呢個問題，洗完面用佢可以抹走埋啲多餘角質，之後上妝貼服咗。

而且我仲發現到一個好用法，就係用佢嚟洗化妝掃。我噴75%玉米酒精落塊潔面巾到，之後來回掃，掃到好多污糟嘢出嚟。如果係化妝師/美妝愛好者需要消毒掃具，試吓唔好噴落紙巾，噴落呢隻棉柔巾，好用好多!!!

我一般用完佢抹面之後會抹埋梳妝檯，或者地下啲頭髮😹，物盡其用。佢係天然植物纖維可自然分解，對環境友善👏🏻

總括而然我會回購，而且會揀返tempo!