D-UP

雙眼皮膠膜

由有記憶以嚟都係一邊眼雙眼皮一邊眼單眼皮，仲要係好厚重嘅單眼皮，黐咗膠紙、膠水廿年都未變雙眼皮⋯
幾年前見日本美妝系Instagrammer介紹呢枝膠水，買嚟試完就好似發現新大陸，原來膠水有分黏貼式同皮膜式！效果好到用咗幾年都不斷回購。
＊黏貼式就係將眼皮黐住，形成雙眼皮效果。搽嘅位置就要距離睫毛遠少少。
＊皮膜式就係膠水乾咗就會有塊少少硬嘅膜去撐出雙眼皮。搽嘅位置就會比較接近睫毛。

呢隻膠水要喺完成眼妝後同夾睫毛之前用，如果夾咗睫毛就好容易搽到睫毛，就會黐住一嚿。
膠水未乾之前係白色，完全乾透就會變透明，好似做手工嘅白膠漿。雖然有少少令面，但唔需要擔心影響妝感。解決呢個令面問題，有兩個方法：
①用令面眼影。
②乾透之後用眼影掃上面少少殘留嘅粉掃落去，可以減低令面問題。
無咁令面真係睇唔出有膠水痕跡，效果比其他黏貼式膠水同膠紙自然好多。

如果當日眼皮真係好重，單搽一層未必夠力撐出雙眼皮。呢個時候就要搽兩層，但要等第一層乾咗再搽第二層。搽兩層薄比搽一層厚嘅效果好好多。可以參考呢張相。

每一日眼嘅狀態都有少少唔同，要黐到完全對稱其實真係好難😩不過少少唔對稱嘅雙眼皮都好過一邊雙眼皮一邊單眼皮。