LANCÔME

極致持妝輕透粉底液(已停產)

我皮膚係屬於非常容易長粉刺暗粒嘅混合肌，所以喺選擇底妝上面係非常小心。

我之所以買Lancôme 呢隻粉底，係因為佢上面寫明係non-comedogenic，即係產品裡面係不含會容易造成粉刺嘅成份，呢點係燒到我買嘅最主要原因。

另外佢本身亦有防曬功效(SPF 38,PA+++)用起上嚟亦唔容易溶妝(但會浮粉)，呢兩點亦都加咗唔少分。

咁點解我唔俾高啲嘅分數呢？
原因有兩個:

第一，佢遮瑕度真係好一般。
我唔係講緊佢要遮到嗰啲3D立體大暗瘡，但最少都應該要遮到少少暗瘡印啦，但係係完全遮唔到嘅。佢唯一遮到嘅係泛紅問題，所以如果你本身皮膚唔差係okay嘅，但對於我呢種又有暗粒又有暗瘡又有粉刺嘅皮膚嚟講就有其他牌子嘅粉底遮瑕度係比Lancôme Teint Idole Ultra Wear出色好多啦。

第二，頭先都有提過下，就係隻粉底真係
好容易浮粉。 我上網見到好多人都話上妝好貼，我諗真係同佢地本人膚質無敵有關。我試過做完facial，做完peeling，敷完面膜第二日用呢隻粉底都係有浮粉問題，用美妝蛋(beauty blender)上會貼啲但遮瑕度又會再低啲。

我諗喺未搵到一隻更加好嘅粉底都會繼續用佢，但用佢係有少少騎牛搵馬嘅感覺，並唔係好用到覺得係我嘅「本命」粉底。