Charlotte Tilbury

魔法面霜

14號晚收到魔法面霜同無瑕密粉嘅試用裝，真係好開心呀！所以決定今晚開如試用，16號晚再發表心得。因此今晚開始記錄！

首先介紹咗魔法面霜先，魔法面蘊含品牌獨特的Magic8複合成分，包含山茶花精油、玫瑰果精油、透明質酸等成分，仲有SPF15+，聲稱功效係緊致肌膚，改善無光暗肌，潤澤保濕，同時可妝前使用，讓妝容變帖服無暇。

14號晚（魔法面霜）
上臉效果：保濕 3/5
：光澤 5/5
：緊緻 3/5
：減淡細紋 3/5
好似忌廉咁，好有質感但係易推開，一上面就勁有光澤感，但係唔知係咪知道有SPF15+,自己仍住會好焗，睇下呢兩日會唔會爆痘痘

15號朝（魔法面霜+無瑕密粉）
上妝效果：隱藏毛孔 5/5
：隱藏細紋 3/5
：上妝貼服 4/5
：妝容持久5/5
早上睇，面霜冇令到痘痘更大粒，雖然唔會消痘，但係都唔會惡化，毛孔睇落比平時細少少。
防曬前再搽面霜，上妝的確比平時易上，而且唔會好“笠”。
😍比較驚喜係毛孔遮蓋力，因為一路用Nars light reflecting 粉底，毛孔遮蓋力同遮瑕力都較低，今日加咗面霜之後到最後定妝，毛孔基本睇唔到👍
細紋方面正常，比較失望係塊密粉，壓得好實，粉質細緻似Nars大白餅，但係難以取粉，上面易結塊，就算定好妝都有粘笠感覺，用作霧面妝唔可取，唔知正品係咪都係咁。以後只會用作眼部定妝，可能係因為有顏色嘅原因，感覺好似比用Nars大白餅自然啲。
😍💖💖💖💖持妝8小時，除咗鼻，其他完全冇甩妝，補妝效果都超完美！！！！

15號晚（魔法面霜）
上臉效果：保濕 4/5
：光澤 5/5
：緊緻 3/5
：減淡細紋 3/5
洗完面再搽，感覺真係光澤感滿分，保濕效果比琴日更滿意，唔知係唔係開始適應面霜，吸收到更多。由於緊緻同減淡細紋係要長時間使用先見到結果，可能之後會再追評。

16號朝（魔法面霜+無瑕密粉）
上妝效果：隱藏毛孔 5/5
：隱藏細紋 3/5
：上妝貼服 5/5
：妝容持久5/5
超！完！美！今日用慣咗之後發現魔法面霜+遮瑕+無瑕密粉係完美拍檔，上妝隱藏毛孔，冇白頭，我換咗Nars個掃取粉好得，啲粉平均但係充足，唔使上好多次。帶妝10個鐘，完全不脫妝，出油位少少溶妝，但係效果好自然，反而有水光感。魔法面霜係用完試用之後一定會買。

16號晚（魔法面霜）
上臉效果：保濕 5/5
：光澤 5/5
：緊緻 4/5
：減淡細紋 3/5
今日終於感覺到緊緻嘅效果，係覺得笑嘅時候有拉扯感，而唔係洗完面好乾嗰啲繃緊，光澤感第一日已經好鍾意，唔再特別講，反而保濕度有更好嘅感覺，因為今朝有發現出油少咗，但係塊面都仲好潤。平時如果用其他護膚品，第二朝出油反而會嚴重咗。所以我感覺佢係真係滲透到入皮膚，形成保護，但係又唔會焗。👍👍👍