b.glen

礦泥潔面乳

我一直都好鍾意同品牌同系列嘅產品咁配合嚟用，因為廠商研發產品嘅時候都以全個系列配合嚟用發揮最佳效果為目的咁去做研究，所以今次收到@cosme 嘅邀請一次過試用b.glen嘅礦泥潔面乳同C精華液真係好期待快啲收到試用2星期，然後同大家分享嘅呢一刻: )

收到當晚用卸妝油缷完個防曬即刻開出嚟用，作為童年冇智能電話/tablets 玩嘅90s kids，見到紙盒內有說明書可以慢慢噒表示真的很興奮~XD


好，等我快啲入返正題先，打開白色簡約風嘅設計，跟說明書上嘅指示，唧一粒櫻桃大細嘅潔面乳，唧出嚟係灰綠色嘅乳霜狀，未加水都好易推開，加咗少少水捽開，發現佢唔係太起到泡就諗:應該佢清潔力會弱少少。結果用咗2個幾星期又唔係咁睇，冇咗嗰種平時用咗洗面膏/啫喱掹掹緊嘅感覺，又唔係用普通洗面乳洗完唔覺洗咗嘅無力感，取而代之因為佢有礦物成份”蒙脫土”可以好似磁鐵咁温和地喺毛孔入面吸晒啲污糟嘢出嚟，又繼續keep住皮膚天然軟彈嘅狀態，未搽任何保濕產品上面都有咁嘅感覺，真係幾surprise。

總括嚟講，呢支潔面乳畀我嘅體驗係好outstanding嘅，甚至乎我發現我2個細佬都應該有忍唔住偷用XD
不過for學生我覺得應該個價錢就可能貴咗啲，$309 / 150g，但係如果係買嚟全家用我係推薦嘅，因為佢所有膚質都啱用，難怪我啲細佬都有keep住偷用啦！

多謝你㩒入嚟睇到最後，有興趣嘅話遲少少睇埋我點評論b.glen C精華液: )