factiv

HYA3補濕修護精華

今次係第一次接觸factiv呢個本地品牌嘅產品，一收到呢支「HYA3透明質酸補濕精華」就已經好期待使用！簡潔嘅黑白設計，有專業醫美產品嘅感覺😆加上產品嘅名稱HYA3以及樽身label都可以清楚睇到精華嘅活性成分(HYA=HYAluronic acid透明質酸、Panthenol泛醇)同濃度(3%)，呢兩點都令使用者更加安心。

扭開樽蓋，樽蓋頂會突起，撳一撳個頂就可以吸取到精華，設計都幾特別；不過同一般精華樽相比，感覺會比較難調整想要嘅用量。

呢款透明質酸補濕精華係偏水狀嘅質地，好容易推開，亦有一定嘅潤澤度。搽匀全面之後，一開始會覺得有輕微嘅黏笠感，過多陣就會比皮膚吸收。


本身皮膚偏乾、容易甩皮、泛紅，毛孔亦比較粗大，使用化妝水及HYA3透明質酸補濕精華之後，可以見到鼻頭甩皮嘅情況有明顯改善，鼻骨附近比較粗大嘅毛孔有輕微收細。


面頰泛紅問題都見到有輕微改善。另外，近排人中位爆左粒瘡，擠完有少少傷口，不過搽呢款補濕精華個陣都唔覺得傷口位置乸，證明無刺激成份，適合醫美或曬後使用。

不過，可能因為呢款精華唔係比較滋潤嘅質地，當喺乾燥嘅日子使用，搽埋面霜、防曬後再簡單上埋碎粉，鼻頭甩皮嘅情況亦有再出現，但就唔算嚴重。整體而言都算滿意呢款精華嘅保濕功效，不過就建議喺無咁乾燥嘅日子使用喇。