KAMINOWA法之羽

有機防脫髮護髮素

好開心@ cosme抽到試用法之羽KAMINOWA一套四件防脫育髮產品。法之羽係日本品牌，由皮膚科醫生和日本頭髮診斷專家合作研發，全綫產品都係日本製造，而且功效得到日本厚生省認可，所以我都好期待佢嘅效果。
我以前細個啲頭髮都幾濃密，但係因為經常染髮，有時仲加埋電髮，令到頭髮變得脆弱，容易甩頭髮，尤其係頭頂條分界線變得明顯。
官方說明話法之羽護髮素能促進頭皮血液循環，促進頭皮毛囊健康，強韌髮根，防脫髮，有助毛髮生長，增加頭髮濃密度。
我鐘意佢係無矽配方，但係留意到佢含有礦物油成份，亦都係因為咁我只係用佢喺髮尾作普通護髮素。佢個質地係帶少少杰身嘅白色乳液狀，潤髮效果唔錯，啲頭髮洗完都柔順。
效果：
我試用咗成個系列嘅產品三十日，最明顯嘅效果就係洗頭嘅時候覺得甩嘅頭髮少咗，而我最在意嘅頭頂條分界線係變得無咁明顯，而且呢啲效果係試用咗產品兩個星期左右已經見到，都算幾驚喜。
至於呢隻護髮素，潤髮效果係OK嘅，但係由於我本人唔鍾意用有礦物油嘅產品，所以扣咗少少分。