ettusais

稜鏡光感柔滑眼線液

色號： 05 灰啡色

試用程度：一星期內非連續使用了幾日，情況有朝早出門帶妝到夜晚、或收工後快速換妝赴約等，天氣已經進入炎熱的日子，亦有幾日遇上微雨。

- ettusais多年前轉branding後包裝大改，直覺地睇筆身顏色就知道出到嚟咩色，比起以前要對號碼更為方便；但改包裝後筆上字體難以辨認（手機影都要夾硬tune先見到字），剛好我有ettusais嘅眼線膠筆，有時拎上手先知自己攞錯產品。
如果可以保留全筆顏色嘅部分但d字嘅對比度高番d就完美。

- 05號名叫灰啡色，實物出到嚟的確係一個又灰又啡嘅冷色。當中有好微細而且帶偏光色嘅珠光閃粉，畫上眼皮後唔會明顯眼到閃粉一粒粒，而且唔會太glossy或太matte。黃皮膚有時畫啡色會太暖變得更黃，但呢個色調得幾啱啱好，特別得嚟上眼後又有種剛剛好嘅中庸感。

- 有一個眼線液嘅通病：如果眼皮上面已經有其他化妝品係底時，佢畫上去時個附著力會唔夠好，偏偏自己習慣底妝/眼影後先上眼線，品牌介紹入面話「由日本筆匠手工製作的毛料」反而會吸咗前面d產品走，塞住毛料、整花眼妝又令到眼線液出唔哂半透明咁，有少少尷尬。
最快嘅解決方法係知道會用佢就畫咗眼線先上其他嘢...但呢個方法只適用於早上化完全妝然後全日唔會再轉，如果會下午補妝/收工轉妝嘅人就要準備定一張紙巾抹走比筆毛吸走嘅product再瘋狂搖番新嘅眼線液出嚟先用到。

- 持妝度幾本上hold到全日，微雨嘅日子都冇溶眼線！可惜承受唔到捽眼，一定會化，不過可能因為formula嘅關係，佢嘅化唔係熊貓眼嗰種，而係好似多咗層下眼影咁，因為自己style唔係好sharp嗰種所以尚算接受到，但如果追求妝容清楚嘅人可能會覺得唔ok。

- 未有機會分享到佢放耐咗之後嘅表現，不過跟據我手頭上嘅其他ettusais產品嚟估計，應該用耐咗之後表現都同一開始差不多。

以下少少實驗：🔺一開始上手時狀態🔺指腹捽咗兩下，已經可見化咗🔺凍水過後，同捽甩時分別不大🔺45度溫水，甩多咗但仍然可見線條外框🔺眼唇卸妝液中間畫過一條，可見輕易卸走

總括而言：我覺得ettusais轉branding後成個形象好咗好多，但product好唔好用係消費者會直接面對到嘅體感，今次收到嘅眼妝三件組入面有一支睫毛液，一支睫毛底膏同呢一支眼線液。呢一支眼線液嘅顏色/texture做得好出色，可惜使用感受未如理想，如果會回購應該都只會係因為想要佢獨特嘅顏色。
見到佢地嘅廣告愈來愈靚嘅同時都寄望ettusais會係產品設計上更進一步。