BOBBI BROWN

無重輕霧粉底液 SPF 15 PA++

今次試用既係Bobbi Brown最新既無重輕霧粉底液，收到既顏色係N-010 (Neutral Porcelain)，比我既膚色白少少，但係上妝後唔會死白或著有面具感～

粉底液擠上手水潤有流動性，上臉容易推開，但係比較快乾，小範圍分區上妝比較好。上臉感覺神奇地有d黏黏既，可能因為加左蜂蜜萃取(?)試過用刷同海綿上妝，個人覺得用海綿上妝會比較適合

薄薄地上左一層，瑕疵泛紅大概遮到6-7成，不太深既毛孔都能夠隱藏好。粉底感覺滋潤，平時鼻翼容易卡粉浮粉既位置都能夠輕鬆上好，唔會卡粉顯乾紋。

至於有瑕疵的位置可以疊加粉底增加遮瑕度，疊加既粉底能夠好好融入原本既底妝，唔會有邊界感。整體妝感偏微霧，但會有微微光澤感，令人覺得皮膚好健康～

為左測試持妝能力，故意無上妝前打底，定妝都只係上左少少碎粉。持妝7小時左右，經歷過香港34度高溫🥵只有鼻因為出油比較多而有d脫妝，但係無明顯既斑駁。至於臉頰出油比較少既位置變左奶油肌妝感🩵

總結黎講，呢款粉底液輕薄自然，比到人一種天生好皮膚既感覺，好好咁上妝前仲可以令持久力提升，對付又濕又熱的夏天真係好正