BOBBI BROWN

無重輕霧粉底液 SPF 15 PA++

🧚🏻膚質 / 膚況
夏天油性；敏感肌: 唔可以亂用護膚品同化妝品 (青春期爛過面，食過A酸)
瑕疵皮: 主要係臉頰有痘印、鼻頭毛孔較粗大、膚色不勻 (主要鼻周圍泛紅同啡色痘印)

🧚🏻對化妝品嘅要求
個人比較重視氧化 > 持妝 > 均勻膚色 > 遮瑕嘅效果，而Bobbi brown呢隻粉底液都做到以上功效。

🧚🏻妝前護膚品 + 化妝品
夏天: 薏仁化妝水、防曬、粉底
**即使我係油性肌膚，我面頰兩側有時都會好乾，所以喺用控油粉底之前一定要做好妝前保濕。

🧚🏻上妝工具
Etude House粉底掃
色號: Sand (N032)

先擠一小揼粉底液落手背，用手指嘅溫度推開再點落半邊臉。上臉後輕輕推開，推開後臉中近鼻嘅粉底比例係最多。然後用掃掃勻半邊臉，重覆步驟於額頭同另一邊臉。

‼️注意
#粉底可堆疊，瑕疵位可視乎需要而局部再遮
#粉底乾嘅速度正常，動作可以快手啲
#新手建議半邊臉咁上，唔好急最緊要快

❄️妝感
正如商品說明所講，佢做到長時間控油、冇面具感、輕薄透氣同貼服。佢嘅流動性不高但延展性表現不錯。質地水潤易推，我通常都會半揼半揼咁擠嚟用 (半揼可以搽到半塊臉)。上臉後亦唔會繃緊同埋會變霧面質感。

‼️注意
留意控油粉底唔可以太慳，要用正常份量去搽塊面，如果唔係就會太快乾然後好難推。即使係油性肌膚都要做好保濕，我塊面試過太乾，兩側面頰甩皮，上粉底之後就卡粉。

因為我夏天係油肌，所以鍾意乾爽唔黏笠、控油度高嘅粉底。呢隻粉底液滿足到我夏天嘅需要，因為控油同持妝方面都表現唔錯。

❄️控油
一搽完已經覺得好乾爽，完全冇黏笠感。即使係夏天都唔需要加強控油。我自己返工長期喺冷氣房，返學就進出冷氣房。即使過咗全日都淨係T字位同鼻頭出油，出咗油之後有種奶油肌嘅感覺，個光澤感好靚。終於唔會喺出油之後再變大油田，嗰一種光澤感我非常鍾意！如果大家唔鍾意都可以自己用碎粉吸返啲油光。

❄️遮瑕
日常我多數淨係會上一層好薄嘅粉底液，但其實已經遮到70%痘印、100%血管、80%毛孔同80%黑眼圈 (我黑眼圈問題不嚴重)。基本上用少少已經可以達到均勻膚色嘅效果，不過我本人唔介意瑕疵唔係100%遮晒。特別日子要見男朋友 / 出席會影相嘅聚會就會局部再用呢隻粉底液去遮。

‼️注意
#試用期間冇試過帶住口罩實測全日，所以對於帶口罩甩妝嚴唔嚴重就不予置評 ～

❄️氧化
個人覺得只有輕微嘅氧化問題。N032原本係比我嘅膚色白，所以啱啱上完粉底嘅顏色明顯比條頸白咗少少，我有少少唔慣色號唔啱。我通常每日帶妝超過10小時，放工/放學返到屋企，粉底嘅顏色氧化後就完全同我嘅膚色一樣喇。冇變黃臉婆，冇點變灰！

❄️持妝
原先以為我薄薄地咁上一層粉底液唔會last到好耐，而我平時出油都冇用蜜粉吸返啲油嘅習慣，所以咁樣先可以真正試到佢嘅持妝效果。朝早遮到70%嘅痘印去到夜晚我覺得得返50%，算唔錯了！

❄️總結
商品說明嘅效果都有做到:
妝感: 8.5/10
控油: 9/10
遮瑕: 7/10
氧化: 8/10
持妝: 8/10