NARS

Light Reflecting™原生光亮肌精華氣墊粉底 SPF 50+/PA++

首先多謝@cosme抽中我試用【NARS 全新 LIGHT REFLECTING™ 原生光亮肌精華氣墊粉底 SPF 50+/PA++】
好開心可以抽中，因為我本身都好鐘意用NARS嘅產品，佢哋嘅粉底，胭脂同唇膏我一直有用開，今次可以試用佢哋cushion真係好開心！我係混合性皮膚，冬天偏乾，夏天偏油，轉季時鼻翼會乾到甩皮。我收到嘅色號係Mont Blanc，適合自然偏白嘅膚色。
近期因為轉季，鼻翼位好乾，上任何底妝都唔夠貼，容易甩皮。我第一次用呢款cushion時覺得雖然保濕，但都係會睇得出有少少甩皮，不過對比其他底妝，效果已經算唔錯，因為我鼻翼位有大面積甩皮，上完妝後都只係有少少甩皮。上完妝後好有光澤同埋提亮效果都好明顯。上第一層之後，毛孔好明顯已經全部遮住，而且有明顯嘅光澤感。上第二層後，基本上可以唔用遮瑕，都遮到七八成！不過亦都因為好有光澤感，我覺得以香港嘅天氣可能會比較容易出油，所以一定要好好咁上碎粉或者粉餅黎定妝！
另外，我分別試過上完妝戴口罩同打邊爐。戴口罩幾個鐘後會因為出油而有少少浮粉，用紙巾印一印就無事，呢層都可以接受嘅。但係持妝7個鐘再加上夜晚打完邊爐之後就出現好明顯嘅浮粉，斑駁溶妝。不過好在印一印都ok，只係帶走咗d妝，補下妝都可以接受嘅。所以呢款cushion可以戴口罩用，但唔係好適合打邊爐用，打完邊爐一定要補妝！

對比NARS舊款白色盒cushion，呢款新款cushion帶出門補妝都幾方便，因為舊款成日會閂唔埋嗰盒嘅情況出現，我買咗幾次新盒都有呢個問題。而今次新款cushion解決咗呢個問題，而嗰cushion盒嘅大細又差唔多，放入袋都好輕便！今次新款cushion嘅粉撲改良咗，比起舊款嘅大咗，上粉底嘅速度會快d同方便d，但又保留咗嗰尖頭位，上妝同補妝都好方便。不過如果可以好似舊款嗰尖頭位咁尖會更加好👍🏻
另外，新款嘅cushion㩒落去會比舊款嘅同其他氣墊實，都幾特別！
值得提一提，粉底液嘅容量變少咗，舊款係有12g，而新款係得11g🙈總結：我覺得呢款cushion比較適合偏乾嘅皮膚，如果係油性肌膚同埋係香港嘅春夏季都未必適合用！如果係香港春夏季用需要用控油嘅妝前打底，一定要補妝同埋好好定妝！