SK-II

護膚精華 (神仙水)

第一次用 SK-II 神仙水，果然名不虛傳💖 推薦！神仙水用磨砂玻璃樽裝住，包裝好高級。個樽嘅開口有啲細，要倒一陣先倒到我要嘅份量（不過咁樣都好嘅🫢可以慳住用免得倒過量浪費左）
液體質地流動性高，搽喺面上絕對唔會有黏膩感，吸引得好快。我會將神仙水倒喺化妝綿上，抹勻全面；之後就再倒一啲喺手上面，拍喺面上並且輕輕按壓直到吸收哂為止。經過呢兩步驟之後，會feel到肌膚滋潤嘅感覺，最後再用其他精華及面霜。因為神仙水質地清爽，所以後面疊加精華液同面霜都唔會過於厚重！

第一、二次用神仙水嘅時候，真係覺得陣味有啲怪……但用用吓就慣了，加上後面再搽精華/面霜，呢陣味都會被蓋過，所以都唔係一個大問題。而且佢效果真係好好，味道怪啲我都可以接受🤭

至於點解我覺得佢咁好用呢？

首先，神仙水嘅剔透亮肌效果真係好好好犀利，勁過好多精華！因為我皮膚算白，但睇落去就係硬係好黃同好暗啞，呢個問題由中學一直存在到而家，所以都用過唔同美白/提亮，而神仙水我可以話係最快有明顯效果嘅產品！喺14日使用期間，真係會留意到皮膚明顯白淨咗，無之前咁黃。個效果係明顯到有日照鏡時，我係突然之間覺得自己好似白左好多 😳 嗰吓真係有啲衝擊！
睇返相，都會見到用前/用後有明顯改善，左邊係用之前，皮膚比較黃、暗啞，右邊係用左10日左右，皮膚變白變亮、少咗黃氣，仲多咗血色感，白裏透紅；
第二，講到化妝水或精華，保濕係基本嘢，神仙水當然做到啦。但難得嘅係，使用兩星期之後，肌膚自我保濕力好似比以前強！就算無搽其他嘢，皮膚都會自己keep住水份飽滿，時刻有種水潤光澤感 ✨✨