b.glen

長效防曬水潤肌精華

試用程度：連續使用10日，每朝出門前上臉。10日當中戶外/室內活動相均，冇試過補防曬，適逢天氣由涼轉熱而且開始濕焗。

- 扁身Tube裝，設計簡約耐看，磨砂質地襟污糟、揸上手舒服唔易跣。頭兩日試用時容易因管身軟而一下唧太多，不過之後就冇再發生。

- 化學防曬為主，物理防曬為輔，使用時直接唧出即可搽。不過唔係海洋友善嘅路線。

- 見ingredient list有酒精（排成分表第5名），但就算轉天氣嘅日子敏感肌用落都唔覺有刺激或有味。
另外有加入水解膠原蛋白，應該多少對化學防曬傷皮膚嘅成分有d幫助，不過只係用咗十日所以未有辦法判斷。

- 無香味，只有唧出時聞到好淡嘅原料味，搽上臉已經唔覺有味。

- 唧出為白色lotion狀，無潤色或提亮功能。

- 質地十分滋潤，厚薄適中。搽上後一分鐘左右就已經吸收哂，使用後會感覺好似搽完精華咁有層水光貼住皮膚，唔係會成膜嗰種，個潤感同水光可以last到全日而且唔會變暗啞，連續十日使用亦冇潤到生暗瘡。
對於佢嘅質地感到十分驚喜，相信乾肌嘅用家會更加欣賞佢。
- 不過需要注意嘅係防曬需要用足夠嘅量，我平時其他防曬唧兩指上臉同頸剛好；如果呢支照用兩指，個感覺會似搽精華時泵多咗一管咁，但搽到膚感剛好又防曬力未必足夠。所以最後都照用兩指份量，再上少少碎粉收一收番乾令膚感舒適d，而且會形成一種緞光嘅finishing。

- 因為用完佢係會全臉都好有光澤，但始終只係防曬唔係化妝品，個光澤會突顯臉部輪廓（可見相中手背），如果輪廓好嘅會令臉更立體，但如果臉比較凹陷亦都會更加明顯。

- 使用十日後皮膚冇變黑，相信可應付冬季/春季日常使用；夏天艷陽下使用估計需要勤力補防曬。

結論：成分調配適宜，相信佢真係有做到sell緊嘅護膚效果。適合各類肌膚尤其乾肌，膚感舒適而且finishing好靚，如果可以更考慮防曬apply嘅量會更加完美。除非在意自己臉部凹陷先需要迴避呢支，如果唔係都係一支幾好嘅everyday-to-go防曬。