DOLCE & GABBANA

Blueberry Nutri-tint

水油乳混合質地非常透薄，妝感完全零負擔，清涼因子亦令夏天化妝變得舒適，就算出門後亦持續感覺面部有陣陣涼感。
配合Fig Skin Perfector粉餅定妝略嫌唔夠力，可能由於Tint質地太濕潤，粉餅亦偏透薄細緻，力度唔夠。

見過網上介紹推薦使用手指塗抹，但效果奇差，建議用粉底掃或乾用粉底海綿，例如棉花糖Puff或粉底綿。
包裝輕便得嚟高級嘅設計非常出色，使用唧唧膠樽，唔重而且容易攜帶。不過唧唧膠樽喺唔開蓋情況下都撳到，所以就算唔係使用緊都會唧咗啲落蓋頂，另蓋內同唧口都相對污糟。

遮瑕度未達中等，疊加使用嘅遮瑕亦唔理想，反而令疊加咗嘅部位有結塊跡象，需要中至大程度遮瑕的話，建議先喺底部另上遮瑕膏，或另選粉底。

如配Bergamot Glow Primer，甚至任何Primer，妝感似乎更唔適合。嘗試過用Bergamot Glow Primer、LM養膚底霜、Shiseido Blur Primer打底，分別用手指、粉底掃、棉花糖Puff上Tint，但都無法last到下午，只係幾小時就會出現結塊，到下午就會溶妝。
但如果唔用Primer，於防曬後直接上Tint，效果反而更long lasting。

整體嚟講，單用及配合碎粉，仍然係非常好用嘅粉底，但如果習慣要加Primer及用開粉餅，就唔建議呢隻Tint了。