DOLCE & GABBANA

Fig Skin Perfector

包裝及粉餅都非常華麗，金光閃閃而且好墜手，感覺high class，而且偶然發現原來粉餅芯可以簡單拆出替換。粉質的確好細緻，而且帶雲母珠光，雲母仲係成份中排第一位，一打開令人對妝效有很高嘅期待，而我本來亦非常期待。
可惜嘅係...呢個粉餅值得稱讚嘅地方就只有以上...期望越大，失望越大。

粉盒墜手亦等於重，帶出街補妝加重手袋負擔，而且冇配合適粉樸，粉盒內層亦冇足夠空間俾人夾多個粉樸落去，變相即粉樸要另外攜帶，係一大不便。

不過使用大困難應該係呢個粉餅令人最卻步嘅地方，從來未遇過一個粉餅係壓得咁咁咁實，實到幾乎取唔到粉！已經試過用碎粉掃、粉狀粉底掃、散粉樸、乾身美妝蛋、棉花糖Puff、手指，基本上數得出嘅上妝工具都試過，但根本近乎冇辦法取粉。
用手指瘋狂打圈幾十下，或甚至用散粉樸嘅表面不停磨擦，先取到少少粉，份量都不及其他粉餅輕輕擦一下嘅量嘅一半，到底用呢個定妝係要花幾耐時間？
壓粉餅嘅機器壓力要適中，壓得實但唔可以太實，否則就會好似呢個咁，實到令人用唔到。

試用多日，定妝效果一般，主要大家趕住化好妝出門，其實冇足夠時間慢慢磨啲粉出嚟，所以無法好好發揮佢聲稱具備嘅控油同保濕效果，雖然亮澤效果仍然可見。
曾經在其中一個weekend，用咗平時化妝幾倍的時間去嘗試取足夠嘅粉量去完成成個妝，當日嘅妝效的確好好，充滿水潤光澤，全日冇出油亦冇乾燥感，但其實日常真係冇辦法去花一小時淨係為咗定妝。

取粉困難係D&G首要需要解決嘅問題，其次由於取粉上粉較其他粉餅困難，都需要隨粉餅配置返合適粉樸，亦可以俾人帶出街補妝用。
6.5g售價HKD 425，要改善以上問題，先可值回票價。