LAURA MERCIER

鑽光幻魅眼影筆

今次收到Laura Mercier嘅鑽光幻魅眼影筆有兩枝，分別係亮澤玫瑰粉紅modern rose，同微閃玫瑰金色rosegold嘅旅行裝。包裝係可以扭出之後可以扭返入去嘅設計，新開嘅時候筆頭唔可以全部收入筆身，所以蓋返筆蓋嘅時候要小心唔好揩到筆頭。
手臂試色係咁。上面係modern rose，下面係rosegold。
兩隻都係相對穩陣易用嘅顏色，單用定作為打底喺上面疊加粉狀眼影都可以，珠光質地單色用都已經好靚。
個眼妝係簡單用咗呢兩枝鑽光幻魅眼影筆，以modern rose上眼皮打底，集中喺眼尾疊加做出深邃感，眼中眼頭加上rosegold作highlight，再用rosegold畫臥蠶，最後加上眼線睫毛膏完成。呢個眼妝顏色自然珠光細緻，日常出街返工都啱化。

以下係少少用後感。

✅持久顯色
花咗啲時間影咗一輪手臂試色相之後，眼影筆已經定咗妝，我嘗試大力用手指捽，發覺顏色完全唔會被捽開，只有好細粒嘅閃粉被捽散咗同痴喺手指上面。我對呢個持色度真係好驚艷，即係代表就算我多手捽眼都唔會冇咗色。
同時亦都代表搽咗上眼皮之後要即刻blend開，如果唔係佢定咗妝之後就會blend唔開，建議畫完一筆就即刻blend最穩陣。

✅順滑貼膚
眼影筆直接畫上眼皮完全唔會刮眼唔舒服，輕輕力都可以畫到出色，之後用手指blend開都明顯感覺到佢好易推，延展性好好。我個人覺得用手指推比用化妝掃推更加容易推均。