GROWN ALCHEMIST

瞬效水光精華

多謝@ cosme今次提供瞬效水光精華試用品。
第一次接觸Grown Alchemist呢個澳洲牌子，用之前都有睇多少少關於品牌嘅野。睇返官網介紹，品牌主打以科學為基礎，用有機天然植物萃取成份，改善肌膚健康。
而呢枝瞬效水光精華成分主打係全譜分子量透明質酸，透明質酸可以保濕就一路都知，呢枝精華就有唔同大細嘅透明質酸分子，用小分子帶水份去皮膚深層，又有大分子喺表面鎖水，就可以做到一個更全面嘅保濕效果。 包裝用啡色玻璃樽配滴管設計，簡單精緻。不過就咁睇滴管唔到樽底，唔知用到尾會唔會難倒出嚟呢。我唔係專家唔太識啲成分，但就咁數成分得11種，成分相對簡單就冇咁容易有敏感情況。滴出嚟質地好水狀好易流落嚟，我用嘅時候覺得直接滴上面推匀，再輕輕按摩，最方便吸收得最好。

✅溫和不刺激
開始試用之前因為搽過A酸，又遇上轉天氣，塊面好乾又甩皮，搽啲刺激性成分高少少嘅護膚品都會覺得”拿”，但搽呢枝瞬效水光精華就冇呢個問題，喺起哂乾皮嘅狀態下真係幫咗我好多。

✅改善肌膚乾燥
因為主要係透明質酸，保濕效果係肯定嘅，好明顯可以見到皮膚有變得水潤。我覺得呢個精華偏乾爽，吸收咗之後完全冇笠嘅感覺，好似我呢啲混合偏乾肌，搽完再用面霜封住水份效果就更好喇。放返個前後對比圖俾大家睇。