IPSA

極緻再生精華水 (復活神水)

多謝@ cosme 俾機會我試用ipsa嘅極緻再生精華水，ipsa聽得最多係佢嘅流金水，今次呢隻黑金水主打養膚修護，撫平細紋，提亮暗啞膚色，適合我呢啲初老肌膚用。包裝係黑色半透明膠包裝，方便收藏唔怕打爛。質地係有少少厚身嘅水狀，介乎喺爽膚水同精華之間，名 符其實係精華水。

收到貨後立即開始早晚使用，依家大概用咗十日左右，以下係少少用後感。

✅迅速吸收不黏笠
因為我屬於混合性偏乾嘅皮膚，一開始我用倒一個5蚊銀大小喺手心嘅方法搽上面。立即會有保濕感，之後好快就吸收咗，有存在感但唔會黏笠，唔影響後續保養程序。不過我更加喜歡倒喺棉花抹面嘅用法，化妝前輕輕去角質又唔乾，底妝可以更加貼面。。

✅溫和低敏
依家步入初秋皮膚容易乾痕，以往有試過啲刺激性較高嘅爽膚水會痕，但呢枝精華水完全冇呢啲問題，佢寫明咗不含酒精同香料，所以用得更安心。而正因為佢無香料，搽上面會有少少護膚品原料味，唔會臭，不過如果會介意嘅人可能要考慮一下。至於減淡細紋同提亮膚色嘅效果，始終試用時間尚短，喺相片中未睇到明顯嘅分別，我會繼續用，期待更明顯嘅效果。