LAURA MERCIER

幻魅柔霧鎖水唇膏

平日我買唇膏傾向會買潤澤型，今次有機會嘗試呢款Laura Mercier嘅 幻魅柔霧鎖水唇膏，覺得幾新鮮。收到嘅色號係 888 Coral Velour 同埋 520 Scarlet Velvet。 外殼採用磁吸式，係有少許重量嘅質感包裝，全鏡面要注意容易印指紋。手臂試色效果係咁。上面係520，下面係888。
520係偏冷調帶紫嘅紅色，888係有少許螢光感嘅珊瑚色。
以下係我少少用後感。

✅ 色澤濃郁高顯色度
用落最大感受係極高顯色度，輕易遮蓋原身唇色。我本身唇色不算深，但相比一向用嘅潤澤型唇膏，呢款幻魅柔霧鎖水唇膏一搽基本上已經可以達到膏體嘅顏色，唔需要重覆疊加。呢個優點相信對本身唇色暗沉，或者唇色淡存在感薄弱，都有唔錯嘅修飾效果，同時都適合想將重點放喺唇妝嘅妝容。
因為我日常多化淡妝，有時唔想唇色咁實，使用嘅時候我會將唇膏直接塗搽喺唇中，再用唇掃blend開邊界做花瓣唇妝。效果可以見下圖。✅保濕鎖水
霧面唇膏一向對本身唇部狀況嘅要求都比較高，我本身嘴唇比較易乾有死皮，上圖都可以見到我偷懶只搽潤唇膏出嚟嘅效果會係點。呢枝幻魅柔霧鎖水唇膏，以我少數使用霧面唇膏嘅經驗黎講，保濕效果已經算唔錯。一開始搽會覺得膏體係偏乾嘅，如果本身嘴唇有死皮就有機會卡咗啲唇膏喺皮上面，但搽咗上去之後佢唔會再抽乾嘴唇水份，保持到搽上去嗰陣嘅狀態，可見佢保濕嘅效果係有嘅。
所以如果想搽出嚟效果更好，最好事先做潤唇同去死皮，搽嘅時候就唔會有唇膏卡死皮嘅狀況，顏色效果就會更均勻。