SK-II

護膚精華 (神仙水)

SK-II神仙水，真係細細個就聽過呢個名，由於價錢實在唔平，所以冇特別大誘因去買。感謝@cosme試用活動選中，可以試用到傳說中嘅神仙水！

按產品使用方法，每次只需要2-3滴用量。按照以上用量，早晚各使用一次，用咗2星期，其實都只係用咗10ml左右，一支75ml裝，應該足夠3個月使用。所以價錢貴唔貴就個人再衡量喇。

神仙水有種獨特、類似發酵嘅氣味，氣味個人嚟講唔算討喜，但搽咗上面之後氣味其實好快就消散唔係好覺。

試用期間正值乾燥嘅季節，神仙水係好水質嘅精華，搽上面好快就吸收晒，滋潤得嚟一啲都唔黏笠，搽完之後就冇咗洗面後皮膚繃緊嘅感覺。而用咗2星期對我嚟講效果最顯著就係面色明顯白咗，改善到膚色暗啞問題。同時細紋亦淡咗、皮膚穩定咗。秋冬會出現嘅泛紅問題都少咗。