Dove 多芬

輕煥強韌洗髮乳

多謝cosme今次抽中我試用Dove嘅洗頭水同埋小金碗

先講下試用左14日嘅感覺：
我先用紫色呢枝洗頭，佢擠出嚟嘅時候比較似gel狀，但整落濕左嘅頭髮到就會開始起泡，然後好神奇地d頭髮就會越捽越滑，過左水之後feel到頭髮已經滑左！但頭皮都唔會有未洗乾嘅感覺。

洗完頭之後我就用小金碗嚟代替護髮素，搽上濕髮等一分鐘之後過水洗走佢，就會feel到頭髮好柔順，幾乎無打結，好似去salon做左treatment咁，好容易梳開。

效果方面：
我本身係油性頭皮，前一晚洗頭嘅話，夏天嘅時候去到傍晚時分頭皮位置已經會出曬油見到黏笠。所以頭皮位置我一向都用Head n Shoulder去控油。另外，因為我一年都去整兩三次頭髮，每次都有漂/染，所以頭髮偏乾旱，同容易打結。原本頭皮以外位置，因為我好怕洗走洗頭水之後d頭髮打曬結嘅感覺，所以平時我用開Moist Diane白色個隻洗頭水洗髮絲，希望做到用護髮素前頭髮都梳得開，本來以為用Moist Diane髮絲已經算好柔順，但試用左Dove更加覺得驚艷！除左見到我頭皮到傍晚比之前睇起嚟無咁黏笠，沖走洗頭水嘅時候，d頭髮亦比較順滑，頭髮吹乾之後亦都營造到蓬鬆嘅感覺 。用一枝Dove就可以取代我一向同時用兩種洗頭水嘅做法，所以我之後都會回購！
而小金碗我亦都好鍾意。我本身用緊Tsubaki嘅金色髮膜，同Dove唔同，佢係唔洗等候，搽完落去就可以沖水。但係用左Dove嘅髮膜之後，髮絲摸起嚟柔滑嘅觸感比用Tsubaki更明顯，尤其係我有漂過色嘅頭髮， 比起用其他發膜更加 強韌，有光澤，唔會打曬結，或者有嚡熠熠嘅感覺 。沖完涼之後同埋第二日訓醒，d頭髮亦更容易梳開梳順同埋有光澤。
價錢嚟講，Dove小金碗份量多d，單價亦比較便宜，所以之後用完嘅話我亦都打算回購！