日本洗頭水 推薦好用產品

Luna好用推薦：Hair Recipe 米糠洗髮露（生薑檸檬） 嘅真實用後感 質地＆氣味 · 係透明啫喱狀，流動性高，好易起泡。 · 薑味唔攻鼻，檸檬味偏清新，沖完涼頭髮有陣淡淡果香。 洗嘅感覺 · 去油力幾強，沖水時會覺得頭髮有少少「澀」同乾，唔滑捋捋（因為冇矽靈）。 · 建議一定一定用護髮素，如果唔係乾性髮質會打結打到喊。 用咗一個月左右嘅效果 · 甩頭髮方面：有人話甩少咗（尤其洗頭時排水口嘅頭髮量減少），但唔係個個得，視乎體質。 · 頭髮狀態：頭皮清爽咗，冇咁易出油，髮根有啲企身，唔會咁扁塌。 · 缺點：如果本身頭皮偏乾或有濕疹，呢支可能會太乾刺激，要隔日先用。 總結建議 · ✅ 適合：油頭、幼髮、想防脫髮嘅朋友（夏天用特別爽）。 · ❌ 唔適合：乾旱受損、漂染後、敏感頭皮。 · 💡 小貼士：只洗頭皮，頭髮絲輕輕帶過就夠，重點護髮素揸髮尾。

Tobimak好用推薦：呢支洗髮露帶有清新的生薑檸檬香氣，洗頭時聞落十分舒服，令人感覺自然放鬆。 使用後頭皮沒有敏感反應，佢成分溫和不刺激，清潔力恰到好處，能洗得乾淨同時保持頭髮的輕盈柔順，不會過度乾澀。👍🏻 整體而言，這款洗髮露兼顧香氣、溫和與潔淨，特別適合敏感頭皮人士。不過包裝若能改成泵裝會更方便，濕手時更易控制用量。

Paris merci 好用推薦：Moist Diane香水貴油夜間修復洗髮露，睇落比較特別嘅一款。依一款係有果香味道，味道清新。 洗髮露有啲稀，但一至兩泵都已經好足夠全頭使用。起泡力及清潔力正常，如果當天出汗太多就會清潔力不足。本身頭皮出油量不算太多，春夏用後第二朝頭髮比較快笠，而且當天頭髮好易塌。洗完頭之後頭髮順滑易梳，春夏太滋潤，可能秋冬天用會岩啲💕

Sccan好用推薦：洗髮水一向無特定但通常都用開架式， 因為唔太重視洗頭體驗，洗得乾淨唔會太笠有蓬鬆感就得。 Diane依個牌子之前用過不錯， 依款新嘅貴油系列主要係見到個樽靚所以買。 效果：蓬鬆感十足，頭髮保濕 質地： 透明比較杰液體狀，起泡同用量都正常 香味：超濃花香香水味，留香超強！洗完頭都飄住依陣味，如果鐘意香香嘅好岩用依款 缺點：滑溜感不明顯，但都有撫直髮絲

Amyloid Li好用推薦：味道好香，並且比較控油，啲頭髮洗完唔會乾燥，會keep住買呢個牌子用

Kelvin好用推薦：冬天嘅時候用過石榴嗰支，感覺唔錯。今次買咗新出嘅試埋新出嘅生薑清茶洗髮露。 呢支出嚟有少少淡黃色，質地較稠身嘅洗髮露，並唔似石榴嗰支嘅啫喱狀，起泡係比較綿密厚身嗰種，都容易清洗。洗頭時會有一浸薑味，幾好聞。 呢支主打強靭豐盈，我既頭髮偏油性，出街半日就有點笠，而家夏天容易出油，不會回購。 #火熱新品

hatty好用推薦：💛法之羽有機防脫髮洗髮露💛 蘊含有機認證迷迭香葉萃取，可以促進頭皮血液循環🩸強韌髮根，天然抑菌抗炎溫和不刺激😛洗髮露以低刺激嘅植物性洗淨劑為主要成分，透過綿密嘅泡沫將污垢洗淨，能使髮絲洗完後柔順不糾結且受損髮絲適用😏

Kura好用推薦：呢款洗頭水係無香味，用完之後真係幫助到頭髮生返d bb毛毛，洗頭水嘅質地係比較厚身嘅gel，加水容易起泡，容易過水清洗，產地係日本

Kelvin好用推薦：Hair recipe 主打天然成份，已經試過石榴、生薑款式。呢款係綠茶x柚子，適合油性頭皮使用。 佢係透明嘅流質，起到好多泡泡，起泡之後會有涼浸浸嘅薄荷味，有一浸男士洗頭水味。 我早晚洗一次頭，非常清爽。雖然佢話有保濕效果就唔太覺，但我好啱用。乾爽得來冇起頭皮。對比我平時用開去頭皮洗頭水，清爽程度差唔多，但我相信hair recipe嘅護髮成份更好，但呢支就夏天用較啱。 男士皮膚👦🏻我面部唔易生暗瘡，但尤其而家長期高溫，夏天真係好易出頭瘡🥵。如果用超強油性洗頭水會有頭皮碎，食之髮譜可以幫到我喺夏日穩定頭皮膚狀態，乾爽得來無好頭皮。 Mannings $99一枝，少貴，但效果對得起價錢。前日買2送1已經買左奇異果味🥝試完再寫評價

YolandaAuYeung好用推薦：📝用後感 試用兩週後，頭油油膩扁塌及頭皮暗粒問題大大改善，頭髮變得豐盈清爽，髮質也漸漸變得水潤亮澤，潤澤感UP!! 原來先淨化頭皮，後補充養分就係養育健康頭皮和頭髮嘅關鍵！

Fng好用推薦：Essential 光感水潤 頭水用後感｜夏日之選 ✨ 質地與使用感 呢支Glow & Moist版本係透明凝露質地，推開即起泡，泡沫細密似棉花糖！洗個陣有淡淡花果香，唔會濃到焗親，沖水後頭髮柔順，證明佢真係夠溫和～ 🌟 清潔與保濕效果 主打皮膚用保濕成分，用完頭皮真係有呼吸感！髮尾唔會打結，吹乾後有自然光澤感，第二朝起身都唔會變油頭～ 香港夏天用真係爽，尤其係出汗後個種黏膩感即刻消失！ ⚠️ 注意事項 · 如果你係電染受損髮質，可能要加支護髮素補補水 · 想要豐盈效果嘅話，呢支比較貼服，可能唔係你杯茶 · 千祈唔好貪心唧太多，一個銀幣分量已經夠晒用 🆚 同級洗頭水比較 · VS TSUBAKI金色：TSUBAKI更潤澤，適合乾燥髮； essential 呢支清爽得嚟夠保濕 · VS Merit綠色：兩者都清爽，但Merit去油力太強，乾肌用可能繃緊 · VS LUX無矽油：LUX較乾澀， essential 保濕度贏幾條街！ 💡 使用小貼士 1. 先用溫水沖濕頭髮 2. 唧適量洗頭水係掌心搓泡 3. 用指腹按摩頭皮2分鐘（千祈唔好用指甲抓！） 4. 徹底沖洗乾淨 5

Kayyan22好用推薦：#火熱新品 自己係乾燥+漂染髮質，但見new jeans代言所以好奇想試下 呢款既味道偏清新，較少甜味，似某種瓜既味，我自己就對呢種味感覺普普通通 而吱出尼佢係透明既，清潔度都唔錯，起泡力好勁 4分1包已經夠起泡 洗出尼既頭髮會偏柔軟，幾舒服，相信普通髮質/無漂染髮質使用會更好

Kpl6be6好用推薦：炎夏必備護髮良品推介❣️同扁塌油頭Say Bye❣️ 踏入 #夏天 🥵🥵悶熱潮濕天氣又大汗淋漓～頭髮有乜可能唔扁塌油笠笠吖～出門口一陣就毫無髮型可言🙈最近同貪靚友人傾開有乜解决方法～佢就介紹咗呢個榮獲🌟@cosme 2024日本美妝大賞最佳「洗髮護髮」部門攞咗TOP 3🌟嘅品牌俾Be☺️☺️襯經過萬寧即刻手刀買咗set返屋企試～估唔到效果真係有驚喜噃🫶🏻🫶🏻 . 🙆🏻‍♀️用後感： 産品質地滋潤得嚟卻唔會有油膩感～喺而家嘅香港天氣下使用就啱哂喇❤️用完之後～頭髮順滑貼服又有光澤咗🫰🏻梳頭嘅時候仲冇咁易斷～頭髮唔再因爲打kick而梳到甩到成地都係😃最重要係個香味前調有甜甜果香 ～中調迷人花香 ～後調個性木香～好清新!!兼且持香效果好好～令髮絲全日滲出淡淡清香～連香水都唔使噴～都自帶女神香🤗🤗

Olivia好用推薦：染頭髮太頻密會好傷髮，除左毛燥，仲會暗啞枯燥😣最近用咗呢款向日葵洗頭水，髮質改善咗好多，依家頭髮少咗毛躁，充滿光澤，而且洗完有陣陣花香味，頭髮同心情都靚晒☺️

zetalhc好用推薦：洗嘅時候好容易起泡，清潔力好唔錯覺得有深層潔淨頭皮，不含酒精香料，對敏感頭皮很好

Hamiii好用推薦：買俾仔仔用，洗得幾乾淨 小朋友太鐘意玩水，成日都會唔覺意整到d泡泡入眼 用呢支從未聽佢投訴過會拿眼 買得過👍🏻

Zelooo好用推薦：這個系列的金色和紅色都十分好用，味道是淡淡花香，不會過份濃郁，尤其適合秋冬比較乾燥的天氣，清潔力也足夠，洗完頭髮會順滑，再配上同牌子護髮素更加好用。

sammiimelda好用推薦：呢個牌子嘅洗髮同埋護髮已經回購咗無限次～ 我自己覺得CP值 10分高 無論係紅色定係金色，我都覺得頭髮係有保濕同埋修護嘅感覺 價錢又係適中 會繼續使用👍🏼

Candy Ng好用推薦：長期見Mannings 做優惠時，它都被人一掃而空。而本人有脫髮問題，就買來一試。 老實講，佢價錢唔平，但係好用。它同其他脫髮洗髮水唔同，唔會令你的頭髮愈洗愈乾，而且護髮效果都不俗👍 買它來用，最重要係防脫髮效果，我係覺得再生出來的毛毛，沒有一梳就脫的情況。不過，在開始用時，會明顯見到脫髮情況多了，在購買它時，那位sales 姐姐都講了有呢個情況，所以我見到有呢個情況，都唔係好緊張🤣

Noel好用推薦：由2019年起，每次洗頭都會發現很多掉髮，實在非常擔心。後來請教護髮有道的姊妹，先知道 Return 這個日本品牌，結果就一直使用至今👍 洗髮露呈透明，流動性很高，亦容易起泡。我的頭髮及腰，需要使用兩泵左右。洗髮後，我比較喜歡將頭髮盤起，大約2️⃣分鐘，讓泡泡多留在頭皮上一點時間，之後才沖洗。 雖然，沒有發現長出更多頭髮或 bb毛，不過，洗頭時的掉髮問題大大改善‼️只有原來掉髮的 1/3，實在太值得了❤

GinGin好用推薦：用完頭髮容易梳理，不會容易掉髮，而且洗頭水好香，泡沫豐富，因為係長頭髮，份量用好少就夠，但冇特價時價錢偏貴

Beautygirl好用推薦：頭髮乾旱，未用護髮素，就咁用呢款洗頭水，用完頭髮已經好柔順，又唔會覺得油笠笠

Ice好用推薦：唔建議購買。  試過買呢支同埋同同品牌嘅其他洗頭水用，都係起mannings 或者屈臣氏買，用咗半支都冇就開始頭痕，同埋好多頭皮屑甩落嚟。 可能唔啱我用啊，我用清爽呢一支，佢的確洗完之後嗰下好蓬鬆，好有空氣感好靚，係我想要嘅效果，但係都的確好快就出油。講緊我平時夜晚黑洗完頭去到第二日可能8、9點個頭先開始油，我用完佢之後可能三四點已經好油。 而且一開始用嘅時候仲以為係咁啱身體唔好又或者其他原因，過咗一段時間再買多支嚟用，都係咁嘅情況。同朋友出街朋友甚至問我點解你個頭皮咁紅好似生咗一粒粒嘢咁。真係好痕。 而家仲有半支洗頭水，都唔知可以點算好？

Giselle 好用推薦：Essential Purify 鎖水淨化系列 - 速乾空氣感洗髮露 *:.＊.:*:｡∞︎｡:*:.＊.:*:｡∞︎｡:*:.＊.:* :｡∞︎｡:*:.＊.:* Essential呢個牌子算係平價洗頭水牌子入面其中一個比較出名嘅( •̀∀︎•́ )✧︎呢隻係佢呢幾年推出嘅一個新嘅系列，主打係增加頭髮嘅空氣感，令到平時洗完頭吹頭髮嘅時間可以減少( ˶ˆ꒳ˆ˵ ) 我自己覺得洗完頭之後頭髮係有變得蓬鬆咗( ˘͈ ᵕ ˘͈ )但係吹頭嘅時間都好似同以前差唔多，唔會話特別少咗好多時間₍ᐢ ›̥̥̥ ༝ ‹̥̥̥ ᐢ₎可能係因為我頭髮比較長嘅關係，所以對於佢標榜嘅速乾效果冇乜感覺(´._.｀)

YolandaAuYeung好用推薦：一向用開紅色瓶身的，發現新産品，所以貪生忘舊了😅。香味隨和治癒，但效果並不及前者般絲滑易梳。

brenda好用推薦：洗完頭後很乾，很難梳，一點都唔柔順

Miaomiao好用推薦：頭髮屬於易出油，細軟易塌。次次洗頭吹頭都甩好多頭髮，中間既分間線明顯。 50惠既養潤豐盈洗髮露加埋都過10枝左右，用完之後沖涼去水位明顯見到掉髮少左，屋企吸塵都見到少左掉髮。缺點係用完既髮質會偏笠，特別係夏天，出全日街既下晝d頭髮會笠到撻埋一束束咁，髮根位置會有油味。 試過轉用各種防掉髮洗頭水，雖然控油好d但係防脫效果冇50惠咁好。亦有轉用過50惠藍色話清爽d個款，洗既時候多左薄荷感覺但係一樣咁笠。

FishYu好用推薦：斷斷續續都用左5枝以上，用完真係甩少左頭髮。之前電爛左把頭髮，用呢套滋潤型既頭髮水加護髮素，覺得有逐漸修復緊。不過滋潤既代價係去油表現麻麻，洗完頭髮會比較塌，夏天既時候會易有頭油味。

choichoi好用推薦：沒有普遍日系洗髮產品容易使髮絲因「滋潤」而太油膩的感覺，本來髮量出不多但用後肉眼看上去有比較豐盈

YYeman好用推薦：透明啫喱狀，比一般洗頭水杰少少，擠出嚟有陣青蘋果加玫瑰味，幾清新唔乞人憎，但沖完涼過陣味就散晒，唔好指望留到第二朝。 起泡力正常水平，唔算爆炸多泡但夠用，記住要洗兩次——第一次啲泡會縮晒水，因為頭皮太污糟，第二次先真正起到嗰浸綿密泡，呢個係常識嚟。 沖水嗰下係滑嘅，冇嗰種洗到𠺘𠺘聲嘅乾澀感，但又唔係假滑到洗完好似搽咗油咁，感覺幾正常。吹頭嗰陣明顯少咗斷髮，以前吹完地下好似落雪咁，而家叫做見得人。 不過講真，單用洗頭水嘅話髮尾依然有啲乾，冇可能話單靠佢就變到瀑布咁滑，想徹底潤澤一定要配返同系列護髮素，如果唔係都係爭啲。頭皮方面就幾滿意，無矽靈用完爽身唔痕，第二日起身頭髮仲係輕身嘅，唔會笠到成塊麵餅咁。 整體嚟講，呢支嘢平衡做得唔錯，乾淨得嚟唔乾柴，香味又幾治癒，但如果你把頭髮已經漂到受晒嚴重損嗰種，呢支未必夠力，要再加油輔助。適合正常至偏乾髮質嘅人，極度受損就唔好期望太高。回購的話，會當日常用，但會輪流轉其他深層修護款交替使。😌

chewyfruit好用推薦：太愛太愛啦！！！！爆汁🫐超級超級超級好聞！！ 一個字：香香香香香 簡直係我命中注定啊！！！！😭 洗完頭連撥下頭髮都係香嘅！ 而且我發現佢嘅香味， 竟然比我嗰幾千蚊嘅淡香水更持久！ 用同事嘅話嚟講就係：行過嘅地方都留低香味…… 聞落係爆汁黑加侖子果香， 帶出一絲絲茉莉嘅清幽， 混合苔蘚木質🪵嘅沉穩， 成個大自然嘅綠意香氣🍃舒服又好聞！ 更厲害嘅係呢個蛋白修護護髮素！ 竟然有陣淡淡嘅🥛奶香味！奶香奶慾咁撩死人！ （好聞到身邊嘅好朋友都俾我推介晒……） 🌲植物成分純淨又溫和，一啲都唔黏膩！ 難怪咁好用～ 洗頭水泡泡好豐富，用上頭超溫和， 護髮素就好似Tony幫我用嘅蛋白護理霜咁！ 對頭髮嘅包裹感超級好， 濕髮用手指梳都可以一梳到尾， 洗完頭又順又潤又亮！救命啊！ 睇落好似絲綢瀑布咁！出街行成日都咁靚， 隨時俾人一種感覺：你髮質真係好啊～

呆呆的槑好用推薦：見是夏天限定版買來試試，香味上一樣是TSUBAKI一貫的花香味，隱隱帶有一點薄荷的苦味，使用上明顯帶有冰涼感，清潔力佳，油頭或者怕熱的人可能會喜歡。 不過我不肯定是它的問題還是那陣子剛好壓力比較大，使用後感覺頭髮掉得比較多🥲暫時沒用感覺又沒掉得那麼厲害

劉肥貓好用推薦：清 洗時 頭皮有 涼 浸浸嘅感覺 能為 焯熱頭皮降溫 適合春夏天使用

Viviccs好用推薦：香味撲鼻、特別在染髮後用，紅色系染髮(紅色比較易甩)都維持到。 清潔力足夠乾淨，頭皮唔會太乾或者敏感。 修護力覺得一般，但頭髮有比較油潤、睇落有光澤。

mc好用推薦：漂完髮2日之後就開始用佢，洗完感覺髮絲係柔順嘅，護色就無咩特別驚豔嘅感覺，日常主力清潔洗頭都會揀佢，個人來講都可以再回購 但呢個系列好似搵唔到護髮素，要自己配搭第二款潤髮！

WSY好用推薦：呢個系列嘅洗頭水好香，有好高級嘅感覺！沖涼之後個香味都好持久！

Hazel好用推薦：經常染頭髮，頭髮開始變得乾燥同容易有甩頭髮同斷髮嘅情況出現，髮尾亦十分毛燥無光澤。尼支洗頭水有保濕成份，用完頭髮變得好順滑，冇咁毛燥同有光澤左．

Giselle 好用推薦：Essential Purify 鎖水淨化系列 -清爽防油光洗髮露 *:.＊.:*:｡∞︎｡:*:.＊.:*:｡∞︎｡:*:.＊.:* :｡∞︎｡:*:.＊.:* Essential呢個牌子算係平價洗頭水牌子入面其中一個比較出名嘅( •̀∀︎•́ )✧︎呢隻係佢呢幾年推出嘅一個新嘅系列，主打係清除頭皮過多油脂同時做好頭皮保濕"(⌯︎¤̴̶̷̀ω¤̴̶̷́)✧︎對我呢個乾性頭髮嘅人來講，我覺得佢有啲太過乾爽( ･᷄-･᷅ )雖然佢可以令到頭髮冇咁快因為出油而變笠*ˊᵕˋ)੭但係覺得頭髮同頭皮都有啲太過乾(✿︎´ ꒳ ` )♡︎因此我覺得呢款比較適合頭皮偏油嘅小夥伴用(σ´з｀)σ

Verna好用推薦：這支洗髮水是透明（或者是很淡很淡的淺藍色）啫喱狀，很容易起泡，泡沫很豐盈綿密 我的頭皮是偏油性的，用過很多不同的洗髮水，有些早上洗完頭髮，下午髮絲已經有油光，但這支洗髮水就不同了，它真的能夠做到長效控油，我真的很滿意它帶給我的清爽髮絲 而且洗完頭髮，髮絲不會很乾和打結，吹完頭，頭髮更加變得很柔順，而且過了一整天，頭髮也沒有變得油膩下塌，仍然很清爽，很讚👍